Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 67 Hüküm no: 23 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mîrî kalyon neferlerinden Halil Beşe’nin Eğriboz’da bulunan evini sattığı Fi’l-asl vilâyet-i Rumeli’de medîne-i Eğriboz kal‘ası dâhilinde Aşağı mahalle sükkânından olup hâlâ mahmiye-i İstanbul’da Mîrî kalyonlardan Patrona demekle ma‘rûf kalyon neferâtından Halil Beşe b. Hasan nâm kimesne meclis-i şer‘-i şerîf-i enverde yine medîne-i mezbûre sâkinlerinden bâ‘isü hâze’l-kitâb Osman Beşe b. Ali mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup mahalle-i mezbûrede vâki‘ bir tarafdan Köryılan demekle ma‘rûf Mustafa nâm kimesne mülkü ve bir tarafdan bâyi‘-i mezbûrun karındaşı İbrahim Beşe mülkü ve bir tarafdan Pasbalzâde Salih Çelebi mülkü ve bir tarafdan tarîk-ı âm ile mahdûd fevkāni üç bâb oda ve iki bi’r-i mâ ve kenîf ve eşcâr-ı müsmire ve gayr-ı müsmireyi havluyu müştemil menzilimi tarafeynden îcâr ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile yüz beş guruşa merkūm Osman Beşe’ye bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eyleyip semeni olan meblağ-ı mezbûr yüz beş guruşu tamamen müşteri-yi merkūm Osman Beşe yedinden ahz u kabz eylediğimden sonra menzil-i mahdûd-ı mezkûru mahâllinde kabz ve zabta merkūm Osman Beşe’yi taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-şehri Ramazani’l-mübârek li-sene selâse ve erba‘în mie ve elf. Şuhûdü’l-hâl: el-Hâc Mehmed b. Abdullah, Dizdâroğlu Mustafa Ağa, Kal‘a Ağasıoğlu Mehmed Ağa, İvazoğlu Ahmed Ağa, Külahlıoğlu Kara Hasan, İstefeli Süleyman Beşe.