Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 67 Hüküm no: 24 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı Mustafa’nın Kara Marat’ta olan alacağı Vilâyet-i Anadolu’da vâki‘ Bor kasabası ahâlîsinden Helvâcı es-Seyyid Mustafa b. es-Seyyid Abdullah b. es-Seyyid Abdurrahman tarafından ber-vech-i âtî vekâlet iddi‘â eden el-Hâc Mustafa Ağa b. Ali Efendi meclis-i şer‘-i hatîr-i lâzımü’t-tevkīrde işbu bâ‘isü’s-sifr Kara Marat v. Sava nâm zimmî muvâcehesinde üzerine da‘vâ ve takrîr-i kelâm edip mezbûr Helvâcı es-Seyyid Mustafa’nın Marat zimmî zimmetinde ber-mûceb-i temessük cihet-i deyn-i şer‘îden otuz altı guruşdan on iki guruşunu yedinden ahz u kabz ve yirmi dört guruşu bâkī kalmağla meblağ-ı bâkī-i mezbûru mesfûr Marat’dan taleb ve da‘vâ ve ahz u kabza ve kendiye îsâle tarafından beni vekîl ve nâib-i menâb nasb ve ta‘yîn eyledikde ben dahi vekâlet-i mezbûreyi kabûl eylediğim ecilden mesfûr Marat zimmîye suâl olunup meblağ-ı bâkī-i mezbûru bana edâ ve teslîme tenbîh olunması bi’l-vekâle matlûbumdur dedikde [5b] gıbbe’s-suâl mesfûr Marat zimmî cevâbında mezbûr Helvâcı es-Seyyid Mustafa’ya ancak yirmi dört guruşu deynine müdde‘î-yi mezbûrun kabzını mu‘terif olduğu on iki guruşu ba‘de’l-edâ on iki guruş bâkī zimmetinde deyni olduğunun ikrâr ziyâdeyi ve müdde‘î-yi mezbûru ber-vech-i muharrer vekîl olduğunu inkâr edicek evvelâ müdde‘î-yi mezbûrdan vekâletine beyyine taleb olundukda udûl-i Müslimînden ve kasaba-i mezbûre ahâlîsinden olup mahmiye-i İstanbul’da müsâfiren sâkinler Ebûbekir b. Ali ve Mehmed b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka kasaba-i mezbûre ahâlîsinden Helvâcı es-Seyyid Mustafa b. es-Seyyid Abdullah b. es-Seyyid Abdurrahman nâm kimesne mesfûr Kara Marat zimmetinde ber-mûceb-i temessük hakkını taleb ve da‘vâ ve ahz u kabz ve kendiye îsâle ve bunların mütevakkıf olduğu umûrun küllîsine tarafından müdde‘î-yi mezbûru bizim huzûrumuzda vekîl ve nâib-i menâb nasb ve ta‘yîn eyledikde ol dahi vekâlet-i mezbûre[yi] kabûl etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûcebiyle ba‘de’l-hükm ve’t-tenbîh sâniyen vekîl-i mezbûrdan ziyâde-i mezkûre da‘vâsına beyyine taleb olundukda ityân-ı beyyineden izhâr-ı acz ile istihlâf ettikde fi’l-hakīka müvekkil-i mezbûre meblağ-ı mezbûr on iki guruşdan ziyâde on iki guruş dahi deyni olmadığına mesfûr Marat zimmîye yemîn teklîf olundukda ol dahi yemîn billâhillezî enzele’l-İncîle alâ-İsa aleyhisselâm etmeğin ziyâde-i mezkûre da‘vâsından vekîl-i mezbûr el-Hâc Mustafa Ağa nâm kimesne bilâ-beyyine bî-vech mu‘ârazadan men‘ olundukdan sonra vekîl-i mezbûr meclis-i şer‘de mesfûr Kara Marat zimmî muvâcehesinde bi’l-vekâle ikrâr ve takrîr-i kelâm edip ânifen edâsına tenbîh olunan meblağ-ı mezbûrdan on iki guruşu mesfûr Kara Marat bana edâ ve teslîm ben dahi yedinden ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-şehri Ramazani’l-mübârek li-sene selâse ve erba‘în ve mie ve elf. Şuhûdü’l-hâl: Yakub b. Abdullah, Ahmed b. Hasan, İbrahim b. Mustafa, Ser-tahta Mehmed b. Abdullah.