Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 68 Hüküm no: 25 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doğramacı Onan’ın terekesi vârisleri arasında taksim edilerek aralarında alacak verecek kalmadığı Mahmiye-i İstanbul’da Çoban Çavuş mahallesi mütemekkinlerinden iken bundan akdem hâlik olan doğramacı tâifesinden Onan v. Atam v. Devaser nâm zimmînin verâseti zevcesi Marta bt. Ağabali v. Karabet nâm Nasrâniye ile li-ebeveyn er karındaşı Kirkor nâm zimmîye münhasıra ve tashîh-i mes’elesi dört sehimden olup sihâm-ı mezbûreden bir sehmi zevce-i mezbûre Marta Nasrâniyeye ve üç sehmi mesfûr Kirkor zimmî meclis-i şer‘-i hatîr-i lâzımü’t-tevkīrde mesfûre Marta Nasrâniye tarafından husûs-ı âti’l-beyânı tasdîka vekîl olduğu zât-ı mezbûreyi ârifân Haçuk v. Haçador ve Haçir v. Abraham nâm zimmîler şehâdetleriyle sâbit olan Gabriyel v. Onan nâm zimmî muvâcehesinde ikrâr ve takrîr-i kelâm edip mûrisimiz hâlik-i mesfûrun terekesinden ber-mûceb-i defter beynimizde ma‘lûm tereke ve doğramacı âlâtını tashîh-i mezkûr üzere müvekkile-i mesfûre ile bi’t-terâzî beynimizde taksîm ve her birimiz hisse-i irsiyelerimizi ahz u kabz eylediğimizden sonra ba‘de’l-yevm hâlik-i mesfûrun terekesine müte‘allika âmme-i da‘vâdan ben müvekkile-i merkūmenin zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi kezâlik hâlik-i mesfûrun terekesine müte‘allika âmme-i da‘vâdan benim zimmetimi ibrâ-i âmm-ı râfi‘u’l-hısâm ile ibrâ ve ıskāt edip fîmâ-ba‘d bir birimiz ile vechen mine’l-vücûh ve sebeben mine’l-esbâb kat‘a da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi şehri Ramazani’l-mübârek li-sene selâse ve erba‘în ve mie ve elf. Şuhûdü’l-hâl: es-Seyyid Mehmed Çelebi Kethudâ-yı Doğramacı, Kādızâde İbrahim Çelebi b. Mustafa, Mehmed Çelebi b. Abdullah tahtacı, Salih Çelebi b. Süleyman, Kostak v. Sahak, Köçek v. Kayser, Mardiros v. Tunik, Çador v. David, Marat v. Yasef, Gaspar v. Agop, Abram v. Abacı, Bulduk v. Haçuk, Karabet v. Avanis.