Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 69 Hüküm no: 26 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiragos v. Maçuk’un Eğin’in Samkoruk köyünde bulunan evini sattığı Fi’l-asl vilâyet-i Anadolu’da Eğin kazâsına tâbi‘ Samkoruk nâm karye ahâlîsinden olup mahmiye-i İstanbul’da Firuzağa mahallesinde müsâfiren sâkin ekmekçi Kiragos v. Maçuk nâm Ermeni meclis-i şer‘-i hatîr-i lâzımü’t-tevkīrde akrabâsından işbu sahibü’s-sifr Norsis v. Oseb nâm Ermeni muvâcehesinde ikrâr-ı tâm ve takrîr-i kelâm edip akd-i âtî sudûruna değin yedimde mülküm ve hakkım olup karye-i mezbûrede vâki‘ bir tarafdan Baruh ve bir tarafdan Kogar ve bir tarafdan Erihan mülkleri ve bir tarafdan tarîk-ı âm ile mahdûd fevkānî bir bâb ve tahtânî bir oda ve kenîfi muhtevî mülk menzilimi cemî‘ tevâbi‘ ve levâhıkı ile tarafeynden îcâb ve kabûlü hâvî şurût-ı müfsideden ârî mesfûr Norsis Ermeni’ye yüz doksan guruş[a] bey‘-ı kat‘î ile bey‘ ve temlîk edip iştirâ ve temellük ve kabûl eyledikden sonra semeni olan meblağ-ı mezbûr yüz doksan guruşu mesfûr Norsis yedinden bi’t-tamam ve’l-kemâl ahz u kabz eyledim menzil-i mahdûd-ı mezkûrda ba‘de’l-yevm alâka ve medhalim kalmayıp mahâllinde kabz ve teslîme mesfûr Norsis’i taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Şevvali’l-mükerrem li-sene selâse ve erba‘în mie ve elf min-hicreti’n-nebeviye aleyhi efdalü’t-tahiyye. Şuhûdü’l-hâl: Abdullah b. Hamza, Abbas b. Hamza, Molla Mehmed b. ( ), Osman b. Hasan ve mine’z-zimmî; Bogar v. Gaspar, Artin v. Matos, Bedros v. Mardiros.