Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 280 Hüküm no: 396 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc Osman’ın boşanmış olduğu hanımının terekeden hakkını aldığı Mahmiye-i İstanbul’da Hoca Halil Mahallesi’nde sâkin olup bundan akdem müteveffâ olan el-Hâc Osman b. Salih nâm kimesnenin vârisi zevce-i metrûkesi Rahime bt. Abdullah nâm hatun ile sulbî sagīr oğlu Ramazan’a münhasıra olduğu sâbit ve müte‘ayyen oldukdan sonra mezbûre Rahime mahfil-i <> şer‘-i şerîfde sagīr-i mezbûrun tesviye-i umûri’çün vasiyy-i şer‘îsi olmağla tereke-i müteveffâ-i mezbûra vâzı‘u’l-yed olan bâ‘isü’l-kitâb Abdi Bey b. Oruç nâm kimesne mahzarında ikrâr-ı tâm ve takrîr ve bast-ı merâm kılıp müteveffâ-i mezbûr zimmetinde ma‘kūdün-aleyh olan üç bin akçe mehr-i müeccelimi ba‘de’s-sübûti’ş-şer‘î ve’t-tahlîf vasiyy-i mezbûr yedinden ahz u kabz edip sâir düyûn-ı müsbitesi dahi edâ ve îfâ olundukdan sonra bâkī kalan üç yüz kırk dört akçe terekeden sümün hisse-i şer‘iyyem olan kırk üç akçeyi dahi vasiyy-i mezbûr yedinden istîfâ ve kabz edip sagīr-i mezbûrun hissesi olan üç yüz bir akçe vasiyy-i mezbûr yedinde kalıp min-ba‘d mehr-i müeccelim ve hisse-i şer‘iyyem husûsuna müte‘allıka da‘vâm kalmamışdır, da‘vâ dahi edersem lede’l-hükkâmi’l-kirâm istimâ‘ olunmasın dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fî-gurreti Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: Mehmed b. Musa, Üstâd Ahmed b. Abdullah, Musa b. Ali, el-Hâc Sefer b. Bayram, el-Hâc Ahmed b. Süleyman ve gayruhum mine’l-huzzâr.