Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 70 Hüküm no: 27 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzuncaâbad ve Hasköy Kıbtî vergileri mültezimi Kaşıkçı Mustafa’nın Mehmed Ağa’dan haksız yere aldığı parayı geri ödemesi El-emrü hasbemâ hurrire fîhî nemekahü’l-fakīr ileyhi sübhânehû Yahya el-müvellâ hilâfeten bi-medîneti Kostantıniyyeti’l-mahmiye -gufira lehû- Mahrûse-i Edirne’de Üskübcü Hızır mahallesi ahâlîsinden olup mahmiye-i İstanbul’da müsâfiren sâkin Kethudâyeri bâ‘isü hâze’l-kitâb Mehmed Ağa b. Habib meclis-i şer‘-i şerîf-i enverde Kaşıkçı Mustafa Efendi b. Ahmed mahzarında üzerine da‘vâ ve takrîr-i kelâm edip mahrûse-i mezbûre kurbünde Uzuncaâbad ve Hasköy kazâlarında vâki‘ Kıbtiyân tâifesi maktû‘ları cibâyeti bundan akdem bâ-fermân-ı âlîmiz Kaşıkçı Mustafa Efendi’nin der-uhde ve iltizâmında iken mezbûr Kaşıkçı Mustafa Efendi tarafından mahrûse-i mezbûre sâkinlerinden Berber Veli nâm kimesneye der-uhde ve iltizâm ol dahi ber-vech-i muharrer iltizâm ve kabûl eylediğinden sonra mezbûr Kaşıkçı Mustafa Efendi vezîriazam-ı sâbık İbrahim Paşa kethudâsı maktûl Mehmed Paşa etbâ‘ından olmağın mezbûra istinâd ile bedel-i iltizâma kefîlsin deyü üç ay beni habs ve kürek birle dört bin dört yüz yetmiş yedi guruşumu cebren ve bi-gayr-ı hakkın yedimden ahz u kabz etmeğin hâlâ mezbûr Kaşıkçı Mustafa Efendi’ye suâl olunup işbu yedimde olan fetvâ-yı şerîfe mûcebince bedel-i iltizâma kefâlet meşrû‘â olmadığına binâen ber-vech-i muharrer yedimden makbûzu olan meblağ-ı mezbûr dört bin dört yüz yetmiş yedi guruşu bana geri redd ü teslîme tenbîh olunması matlûbumdur dedikde gıbbe’s-suâl mezbûr Kaşıkçı Mustafa Efendi cevâbında fi’l-hakīka kabzına vech-i meşrûh üzere olduğunu ikrâr ve i‘tirâf etmeğin mûcebince meblağ-ı mezbûr dört bin dört yüz yetmiş yedi guruşu ber-mûceb-i fetvâ-yı şerîfe müdde‘î-yi mezbûr Mehmed Ağa’ya geri redd ü teslîme merkūm Kaşıkçı Mustafa Efendi’ye ba‘de’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-işrîn min-Recebi’l-ferd li-sene selâse ve erba‘în mie ve elf. Şuhûdü’l-hâl: Mehmed Ağa b. Mehmed, Mehterbaşı Ahmed Ağa b. Mehmed Çelebi b. Abdullah, Mustafa Çelebi b. el-Hâc Ahmed, Abdullah b. Mustafa, Duhânî Mehmed b. Ahmed, Yusuf Yazıcı Ahmed Çelebi b. Mehmed, İsmail b. Mustafa, Yakub b. Abdullah, Mahmud b. Hüseyin, Hasan b. el-Hâc Mehmed, İbrahim Efendi Dermânî.