Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 71 Hüküm no: 28 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın Kütahya’nın Menteş köyünde bulunan tımarını kendi isteğiyle Ali Ağa’ya bıraktığı Mahmiye-i İstanbul’da Eski odalar kurbünde Nerdübânlı mescid mahallesi sükkânından Hüseyin Ağa b. Ali nâm kimesne meclis-i şer‘-i şerîf-i enverde bâ‘isü hâze’l-kitâb Ali Ağa b. Abdullah mahzarında ikrâr-ı tâm ve takrîr-i kelâm edip vilâyet-i Anadolu’da Kütahya Sancağı’nda Şehir nâhiyesinde vâki‘ Menteş nâm karye ve gayriden bâ-berât-ı âlîşân mutasarrıf olduğum altı bin akçe tımarımı kendi hüsn ü rızâ ve ihtiyârım ile merkūm Ali Ağa’ya ferâğ ve kasr-ı yed ve yedimde olan beratı kendiye teslîm etmemle ol dahi mâlından teberru‘an bana yedi yüz guruş def‘ ü teslîm eyledikde ben dahi yedinden ahz u kabz ve mesârifime sarfla ba‘de’l-istihlâk meblağ-ı mezkûre müte‘allika âmme-i de‘âvî ve mutâlebâtdan benim zimmetimi ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: Dükeli zu‘amâdan es-Seyyid Mehmed Ağa, Reis Kalemi’nden el-Hâc Said Efendi, el-Hâc Mustafa Efendi, Reis kaleminden İzzetî Efendi, Reis kaleminden Hüseyin Efendi, Abdurrahman b. Ali, İbrahim Çelebi b. el-Hâc Ebûbekir, Dikici karyesinden Şerif Ağa b. Hasan.