Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 71 Hüküm no: 29 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem diyarında şehit olan Şarkîpare kazasından Mustafa Ağa’nın terekesi Bâ-imzâ-i hazret-i efendi. Vilâyet-i Anadolu’da Şarkīpare kazâsı ahâlîsinden iken Diyâr-ı Acem’de şehîden vefât eden Mustafa Ağa b. el-Hâc İbrahim’in verâseti zevcesi Âişe bt. Ahmed b. Abdullah nâm hatun ile sulbî kebîr oğulları olup kazâ-i mezbûrede sâkin Mehmed ve Ahmed ve Salih ve Ebûbekir ve Halil’e münhasıra olduğu şer‘an zâhir ve mütehakkık oldukdan sonra mezbûre Âişe Hatun ile mezbûrûn Mehmed [ve] Ahmed ve Salih ve Ebûbekir ve Halil <> taraflarından mûrisleri müteveffâ-yı mezbûrun terekesine vâzı‘u’l-yed olanlardan hisselerini taleb ve da‘vâ ve ahz u kabza ve kendilere îsâle ve kabz ve îsâl mütevakkıf olduğu umûrun küllîsine vekîl olduğu yedinde olan hüccet-i vekâlet mantûkunca Mehmed b. Veli ve Osman b. Sinan nâm kimesneler şehâdetleri ile hasm-ı câhidde şer‘an sâbit ve sübût-i vekâletine hükm-i şer‘î lâhık olan râfi‘u’l-kitâb Ömer Ağa b. el-Hâc İbrahim meclis-i şer‘-i şerîf-i enverde müteveffâ-yı mezbûrun hayatında şerîki olmağla terekesini veresesine îsâle vasîyy-i muhtâr nasb ve ta‘yîn eylediği Katana Mehmed Ağa b. Ömer mahzarında bi’l-vekâle üzerine da‘vâ ve takrîr-i kelâm edip mezbûr Mehmed ağa müteveffâ-yı merkūmun hayatında şerîki olmağla mal-ı şirketden hazır bi’l-meclis Sarı Hasan Ağa’yı mahmiye-i İstanbul’da Mahmud Paşa Mahkemesi’nde hilâfeten müvellâ olan Eyüb Efendi huzûruna ihzâr ve zimmetinde bin üç yüz guruş müteveffâ-yı mezbûr Mustafa Ağa ile mal-ı şirketden hakları olmak üzere asâleten ve vesâyeten da‘vâ ve ba‘de’l-hükm vech-i muharrer üzere i‘tirâf ve kabz etmekle meblağ-ı mezbûrdan müteveffâ-yı merkūmun hissesi olan altı yüz elli guruşu bi’l-vekâle taleb ederim suâl olunup edâsıyla merkūm Katana Mehmed Ağa’ya tenbîh olunmak murâdımdır dedikde gıbbe’s-suâl mezbûr Katana Mehmed Ağa cevâbında meblağ-ı mezbûru merkūm Sarı Hasan Ağa’nın müstakillen kendi mâlı olmak üzere da‘vâ ahz u kabzını ikrâr müteveffâ-yı merkūm Mustafa Ağa ile mal-ı şirketden olmak üzere da‘vâ ve i‘tirâf ve kabzını inkâr edicek vekîl-i mezbûrdan müdde‘âsına mutâbık beyyine taleb olundukda ahrâr-ı ricâl-i Müslimînden olup mahmiye-i mezkûrede Ayasofya-i sagīr mahallesi ahâlîsinden Ali b. Abdullah ve Süleyman Ağa b. Abdurrahman nâm kimesneler li-ecli’ş-şehâde meclis-i şer‘a hâzırân olup <> istişhâd olunduklarında fi’l-vâki‘ işbu Katana Mehmed Ağa mezkûr Sarı Hasan Ağa’yı bundan akdem mahmiye-i mezbûrede Mahmud Paşa Mahkemesi’nde hilâfeten müvellâ olan Eyüb [7a] Efendi huzûruna ihzâr hayatında şerîki olup ba‘de vefâtihî vasîsi olduğu müteveffâ Mustafa Ağa b. el-Hâc İbrahim ile kendinin mal-ı şirketden bin üç yüz guruş hakları olmak üzere bizim huzûrumuzda da‘vâ ve ba‘de’l-hükm mal-ı şirketden olmak i‘tirâf ve kabz eylemişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-şuhûri Ramazani’l-mübârek li-sene selâse ve erba‘în ve mie ve elf. Şuhûdü’l-hâl: Mehmed Efendi b. Abdullah Efendi, Abdullah Efendi Musazâde, Salih b. Abdullah, Mehmed b. Mehmed kethudâ, Mustafa b. Abdullah.