Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 72 Hüküm no: 30 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Bey’in Kâtipmustafaçelebi mahallesinde ulemâdan birinin oturması şartıyla vakfettiği evin Mehmed Efendi’ye verildiği Tevcîh-i beyt, bâ-imzâ-i hazret-i efendi. Ashâb-ı hayrâtdan Süleyman Bey b. Abdülmennan nâm sahibü’l-hayrın süknâ ve tasarrufu ulemâdan bir racül-i sâlihe meşrûta vakfı olup mahmiye-i İstanbul’da Kâtib Mustafa Çelebi mahallesinde vâki‘ bir tar[afd]an Şeyh Nazmi Efendi Tekyesi’ne ve bir tarafdan Pîrî Çelebi menziline ve bir tarafdan Yavaşca Mehmed Ağa odalarına ve bir tarafdan tarîk-ı âmma müntehî ma‘lûmü’l-müştemilât vakıf menzile tevcîh-i hâkim-i şer‘le mutasarrıf olan umdetü’l-mevâli’l-izâm Rıf‘atî Ali Beyefendi süknâ-yı menzil-i mezbûru ulemâdan süknâya muhtâc mahall ü müstahık olan râfi‘u’l-kitâb Mehmed Efendi b. Abdi’ye ferâğ ve kasr-ı yed eyledikde hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi menzil-i mahdûd-ı mezkûrun süknâ ve tasarrufunu mûmâ-ileyh Mehmed Efendi b. Abdi Efendi ber-mûceb-i şart-ı vâkıf tevcîh buyurduklarında mâ-hüve’l-vâki‘ bi’l-ibtigā ketb olundu. Fi’l-yevmi’l-hâmis min-Şevvali’l-mükerrem li- sene selâse ve erba‘în ve mie ve elf. Şuhûdü’l-hâl: Abdullah Efendi Musazâde, Abdülbaki Efendi el-kassâm, Mehmed Said Efendi b. Şeyh Mün‘im Efendi, el-Hâc Ali Kethudâ, Yusuf Çelebi b. Abdullah tâbi‘-i Sâdık Efendi hazretleri, el-Hâc İsmail Çelebi b. Sekili Mehmed Çelebi, Hazînedâr Ali Efendi, Molla Mehmed b. Musa el-müezzin.