Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 73 Hüküm no: 31 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pirlepe ayanından Yusuf Ağa’nın kaza halkının şikayeti üzerine çalışanlarını hizmetinden çıkardığı Bâ-imzâ-i hazret-i efendi. Vilâyet-i Rumeli’nde Pirlepe kazâsına a‘yânından ve gedikli zu‘amâdan Boçin ve tevâbi‘i za‘îmi olan fahrü’l-eşbâh el-Hâc Yusuf Ağa b. Abdullah meclis-i şer‘-i şerîf-i enverde kazâ-i mezbûre re‘âyâlarından olup mahmiye-i İstanbul’da müsâfiren sâkin Tikola v. Naydinko ve Veliko v. Groza ve Kosta v. Koron ve Panda v. Mitre ve Kogovgarya? v. Petre ve Ramyan v. Nedelko ve Prisat karyesinden Yava v. Yanikola ve İsotko v. Koron ve Hıristodol v. Tedelko ve Petre v. Ustoyan nâm zimmîler vesâireleri muvâcehelerinde takrîr-i kelâm edip ve ta‘bîr ani’l-merâm edip zimmîyûn-ı merkūm asâleten vesâir ahâlî-yi kazâ taraflarından vekâleten etbâ‘ımdan hâzırûn bi’l-meclis Süleyman Ağa ve Murad Kethudâ ve Kasım Yazıcı nâm kimesnelerden vücûhla cevr ü eziyet ve zulm ü te‘addî ederler deyü benden teşekkî ve arzuhâl etmeleriyle binâen-aleyh ben dahi mezbûrûn Süleyman Ağa ve Murad Kethudâ ve Kasım Yazıcı’yı ba‘de’l-yevm hizmetimde istihdâm etmeyip ve vilâyet umûrunda dahi istihdâm etmemek üzere ta‘ahhüd eyledim dedikde hıfzan li’l-makāl ketb olundu. Fi’l-yevmi’s-sâbi‘ min-Şevvali’l-mükerrem li- sene selâse ve erba‘în ve mie ve elf. Şuhûdü’l-hâl: Fahrü’l-kuzât İbrahim Efendi b. Hasan Efendi, el-Hâc Derviş Ağa b. sadr-ı âlî, Mehmed Efendi b. Ali, Solak Mustafa Çelebi b. Abdullah, Abdullah Çelebi b. Nasrullah, Mehmed Çelebi b. Abdullah, Molla İsmail b. İbrahim Efendi, Hasan b. Derviş Osman.