Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 73 Hüküm no: 32 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pravadi kasabası halkı İbrahim Efendi’nin kendilerinden fazladan aldığı para için sulh oldukları Te‘âhüd hücceti. Vilâyet-i Rumeli’nde Pravadi kasabası mahallâtından İskender mahallesi sâkinlerinden Receb b. Murtaza ve Mehmed b. Ahmed ve Köhnehamam mahallesi sâkinlerinden İslâm b. Hüseyin ve Mehmed b. Abdullah ve Mesih Paşa mahallesi sâkinlerinden Ali b. Abdullah ve Selbeylili karyesi sâkinlerinden Halil Ağa b. İsmail ve Ali b. Mustafa ve Mehmed b. Abdullah ve Hüseyin b. Ali ve Yenice karyesi ahâlîsinden İbrahim b. Sefer ve diğer İbrahim b. Ömer ve Sultanlar nâm karye mütemekkinlerinden Yuvan v. Dimitri ve Tronalı nâm karye mütemekkinlerinden İstoyan v. Dimitri ve Gorgi v. Kirkor ve Yako v. Kalço ve Yorgi v. İstoye ve Çirkovna karye mütemekkinlerinden İstefan v. Miço ve Yassıtepe nâm karye mütemekkinlerinden Malo v. Huşo ve Nikola v. Kole ve Dimitri v. İşko nâm <> zimmîler meclis-i şer‘-i şerîf-i enverde yine kasaba-i mezbûre ahâlîsinden İbrahim Efendi b. Mehmed nâm kimesne mahzarında her biri ikrâr ve takrîr-i kelâm edip kazâmıza bâ-fermân-ı âlî vârid olan avârız ve bedel-i nüzûl vesâir tekâlîfimizi ru’yet ve ikāmete mezbûr İbrahim Efendi vekîlimiz olmağla ber-vech-i muharrer bâ-fermân-ı âlî üzerimize edâsı lâzım tekâlîfimizi ba‘de’l-edâ yüz kırk bir senesinde mezbûr İbrahim Efendi ile beynimizde cereyân eden ahz u i‘tâyı hesâb eylediğimizde mezbûr İbrahim Efendi yedi bin guruşumuzu ziyâde ahz u kabz etmişidi deyü târih-i mezkûrda ziyâde-i mezkûreyi asâleten ve vekâleten mezbûr İbrahim Efendi’den taleb ve da‘vâ ve ba‘de vukū‘ı’l-münâza‘a beynimizde muslihûn tavassutuyla da‘vâ-yı mezkûremizden bizi mezbûr İbrahim Efendi ile bin iki yüz guruş bedel-i makbûza inşâ-i akd ve sulh eylediklerinde biz dahi sulh-ı mezbûru kabûl ve her birimiz âharın zimmetini ber-mûceb-i hüccet ibrâ ve ıskāt etmişidik. Mezbûr İbrahim Efendi târih-i mezkûrda vekâlet-i mezbûreden azl ve ihrâc olundukdan sonra yine mezbûr İbrahim Efendi tama‘-ı hâmından nâşî vilâyetimiz umûruna müdâhale etmekle beynimizde ihtilâle bâ‘is olmağın mezbûr İbrahim Efendi’ye suâl olunup takrîri tahrîr ve hüccet olunmak matlûbumuzdur dediklerinde gıbbe’s-suâl mezbûr İbrahim Efendi cevâbında re‘âyâ-yı mezbûrûnun takrîr-i meşrûhları üzere olduğunu ikrâr ve i‘tirâf eyledikden sonra fîmâ-ba‘d re‘âyâ-yı mezbûrûnun umûr ve husûslarına kat‘a müdâhale etmemek üzere ta‘ahhüd eyledim dedikde hıfzan li’l-makāl bi’t-taleb ketb olundu. Fî 4 Şevval sene 1143 Şuhûdü’l-hâl: Mehmed b. Abdullah bölükbaşı ve Kādızâde İbrahim b. Mustafa ve İvaz b. Abdullah ve Yakub b. Abdullah ve gayruhum mine’l-hâzırîn.