Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 74 Hüküm no: 33 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Kara Mehmed’in para vakfının mütevellisi olan Mustafa Efendi’nin bir ev satın alarak vakıf sahibinin şartı gereği para vakfını akar vakfına dönüştürdüğü Vakf-ı nukūd akāra tebdîl. Husûs-ı âti’z-zikrin mahâllinde ketb ü tahrîri için bi’l-iltimâs kıbel-i şer‘den irsâl olunan Mevlânâ Mustafa Efendi b. el-merhûm Yunus Efendi debbağ tâifesinden merhûm Kara el-Hâc Mehmed Ağa nâm sahibü’l-hayrın nukūd-ı mevkūfesine meşrûtiyyet üzere bi’l-fi‘il mütevellî olup mahmiye-i İstanbul’da el-Hâc Pîrî mahallesinde sâkin el-Hâc Mustafa Efendi b. Hasan’ın menziline varıp zeyl-i kitâbda muharrerü’l-esâmî Müslimîn mahzarlarında akd-i şer‘-i şerîf ettikde mahalle-i mezbûre sâkinlerinden el-Hâc Mehmed b. Abdullah nâm kimesne meclis-i ma‘kūd-ı mezkûrda bâ‘isü hâze’l-kitâb mütevellî-yi mezbûr mahzarında ikrâr ve takrîr-i kelâm edip vâkıf-ı mezbûr vakfiye-i ma‘mûlün-bihâsında nukūd-ı mevkūfesini akāra tebdîli şart eylediği ecilden akd-i âtî sudûruna değin yedimde mülk ve hakkım olup bir tarafdan zevcem Zeyneb bt. Abdullah nâm hatun ile yedimde müşterek âhar menzil ve iki tarafdan Hüseyin Çavuş veresesi mülkleri bostan ve bir tarafdan tarîk-ı âm ile mahdûd tûlen ve arzen be-hesâb-ı terbî‘î yüz kırk altı zirâ‘ arsada vâki‘ bir bâb tahtânî oda ve bir sofa ve kenîf ve havluyu muhtevî mülk menzilimi vakf-ı mezbûra akār için cümle tevâbi‘ ve levâhıkı ile yetmiş guruşa mütevâli-yi [mütevellî-yi] mezbûra bey‘ ve temlîk ve teslîm eylediğimde ol dahi ber-vech-i muharrer nukūd-ı mevkūfe-i mezkûre ile bi’l-kavliye [bi’t-tevliye] iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yetmiş guruşu yedinden tamamen ahz u kabz eyledim. Min-ba‘d menzil-i mezkûr vakf-ı mezbûr müstagallâtından olup kat‘a alâka [8a] ve medhalim kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ve ma‘an irsâl olunan Mahmud b. Mehmed ve Osman b. Ahmed nâm kimesneler ile meclis-i şer‘a gelip her biri vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene ve selâse ve erba‘în ve mie ve elf. Şuhûdü’l-hâl: Hüseyin Bey b. Abdullah, İsmail Çelebi b. Hasan, el-Hâc Mehmed b. Ömer, el-Hâc Mehmed b. Abdullah, el-Hâc Mehmed Efendi b. el-Hâc Abdullah, es-Seyyid Ömer Çelebi b. Mustafa, Osman Çelebi b. Mustafa, Ömer Çelebi b. Mustafa, es-Seyyid Mehmed Çelebi b. es-Seyyid Mustafa, Ahmed Çelebi b. İbrahim, Ömer Çelebi b. İbrahim, Mehmed Çelebi b. Receb, Mustafa Çelebi b. Receb.