Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 75 Hüküm no: 34 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Kara Mehmed’in para vakfının mütevellisi olan Mustafa Efendi’nin bir ev satın alarak vakıf sahibinin şartı gereği para vakfını akar vakfına dönüştürdüğü Husûs-ı âti’l-beyânın mahâllinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ Mustafa Efendi b. el-merhûm Yunus Efendi mahmiye-i İstanbul’da el-Hâc Pîrî mahallesi sükkânından merhûm Debbağ Kara el-Hâc Mehmed nâm sahibü’l-hayrın nukūd-ı mevkūfesine meşrûtiyyet üzere hâlâ mütevellî olan el-Hâc Mustafa Efendi b. Hasan nâm kimesnenin mahalle-i mezbûrede vâki‘ menziline varıp zeyl-i kitâbda mastûrü’l-esâmî Müslimîn mahzarlarında akd-i meclis-i şer‘-i şerîf ettikde mahmiye-i mezbûrede Silivri kapısı kurbünde İbrahim Paşa mahallesinde sâkin Molla Mustafa b. Musa nâm kimesne meclis-i ma‘kūd-ı mezkûrda bâ‘isü hâze’l-kitâb mütevellî-yi mezbûr el-Hâc Mustafa Efendi mahzarında ikrâr ve takrîr-i kelâm edip vâkıf-ı mezbûr vakfiye-i ma‘mûlün-bihâsında nukūd-ı mevkūfesini akāra tebdîli şart eylediği ecilden yedimde mülk ve hakkım olup zikrolunan İbrahim Paşa mahallesinde vâki‘ bir tarafdan Hammâmî Ahmed Çelebi menzili ve bir tarafdan Gazzaz Ahmed Çelebi menzili ve bir tarafdan Mehmed Ağa veresesi menzilleri ve bir tarafdan tarîk-ı âm ile mahdûd iki bâb fevkānî ve bir matbah ve dehliz ve kenîf ve tahtânî bir kilâr, ahır ve bi’r-i mâ ve bir mikdâr bahçeyi muhtevî mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık vakf-ı mezbûra akār için iki yüz guruşa mütevellî-yi mezbûr el-Hâc Mustafa Efendi’ye bey‘ ve temlîk ve teslîm eylediğimde ol dahi ber-vech-i muharrer nukūd-ı mevkūfe-i mezkûre ile bi’t-tevliye iştirâ ve temellük ve tesellüm ve kabûl eylediğinden sonra semeni olan meblağ-ı mezbûr iki yüz guruşu yedinden tamamen ahz u kabz eyledim. Min-ba‘d menzil-i mahdûd-ı mezkûr vakf-ı mezbûr müstagallâtından olup kat‘a benim alâka ve medhalim kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an ba‘s olunan Mahmud b. Mehmed ve Osman b. Ahmed nâm kimesneler ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene ve selâse ve erba‘în ve mie ve elf. Şuhûdü’l-hâl: eş-Şâhidûnü’s-sâbıkūn