Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 76 Hüküm no: 35 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müfti Ali Çelebi mahallesinde Mehmed Ağa’nın tasarrufunda olan vakıf evi annesi Ayşe Hatun’a sattığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i şerîf-i enverden irsâl olunan Mevlânâ Müezzinzâde Mehmed Efendi Dârü’l-hilâfeti’l-aliyye Kostantıniyyeti’l-mahmiye’de vâki‘ Müfti Ali Çelebi mahallesi ahâlîsinden olup Dergâh-ı âlî dâme mahfûfen bi’l-meâli yeniçerileri ocağının bi’l-fi‘il dokuzuncu bölüğe mahsûs oda çorbacısı olan fahrü’l-akrân Mehmed Ağa b. Ramazan b. Abdullah’ın zikri âtî menziline varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i kavîm ettikde mûmâ-ileyh Mehmed Ağa tarafından husûs-ı âti’l-beyâna vekîl olduğu Salih Beşe b. İvaz ve Salih Ağa [8b] b. Nuh nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık el-Hâc Mehmed b. Mustafa nâm kimesne meclis-i ma‘kūd-ı <> mezkûrda müvekkil-i mûmâ-ileyh Mehmed Ağa’nın vâlidesi olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Âişe Hatun bt. Abdullah mahzarında bi’l-vekâle ikrâr-ı tâm ve takrîr-i kelâm edip arsasının merhûm Abdülbaki nâm sahibü’l-hayrın vakfına senede yedi yüz yirmi akçe mukāta‘ası ve üzerinde olan ebniye bi-izni mütevellî akd-i âtî sudûruna değin müvekkil-i mûmâ-ileyh Mehmed Ağa’nın yedinde mülk ve hakkı olup mahalle-i mezbûrede vâki‘ bir tarafdan el-Hâc Süleyman mülkü ve bir tarafdan Dimyâdî Ahmed Çelebi mülkü ve bir tarafdan tarîk-ı hâs ve bir tarafdan tarîk-ı âm ile mahdûd dâhiliyesinde tabaka-i ulyâda iki bâb oda ve dehliz ve vustâda bir oda ve tahta-pûş ve hamam ve câmekân ve bir matbah ve kenîf ve süflâda bir kilâr ve bir kârgir mahzen ve bir mikdâr eşcâr-ı müsmire ve gayr-ı müsmireli bahçe ve bir kenîf ve hâriciyesinde ulyâda iki bâb oda ve bir sofa ve dehliz ve vustâda iki bâb oda ve bir sofa ve dehliz ve süflâda bir sagīr oda ve ahır ve bi’r-i mâ ve kenîf ve zât-ı eşcâr-ı müsmire ve gayr-ı müsmire bahçeyi muhtevî mülk menzilini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı kat‘î ile iki bin beş guruşa mezbûre Âişe’ye bey‘ ve temlîk ve teslîm ve arsasını dahi bâ-ma‘rifet-i mütevellî meccânen ferâğ ve tefvîz eylediğinde ol dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl eylediğinden sonra semeni olan meblağ-ı mezbûr iki bin beş yüz guruşu müvekkil-i mûmâ-ileyh Mehmed Ağa vâlidesi mezbûre Âişe Hatun yedinden tamamen ahz u kabz eyledi fîmâ-ba‘d menzil-i mahdûd-ı mezkûrun ebniye-i memlûke-i mezkûresi mezbûre Âişe Hatun’un mülk-i müşterâsı ve arsa-i merkūme hakk-ı müfevvazı olup müvekkilim mûmâ-ileyhin kat‘a alâka ve medhali kalmamışdır. Keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mustafa b. Abdullah ve Osman b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-şehri Ramazani’l-mübârek li-sene selâse ve erba‘în ve mie ve elf. Şuhûdü’l-hâl: Abdullah Çelebi b. Hâfız Ömer Efendi, Derzi Halil Çelebi, Süleyman Ağa b. Hasan, Hacı Abdi b. Süleyman, Mustafa b. Abdurrahman, Molla İbrahim b. Salih el-müezzin, Mahmud Çelebi b. Abdurrahman, Mehmed Çelebi b. Ahmed Paydostcuzâde.