Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 78 Hüküm no: 37 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın kendisini habsederek parasını alan Trabzon valisi kethudâsı Süleyman Ağa ile olan davanın anlaşmayla sonuçlandığı Bâ-imzâ-i hazret-i efendi, ibrâ-i zimmet. Trabzon ahâlîsinden ve gedikli zu‘amâdan Hüseyin Ağa b. Mehmed-i sânî nâm kimesne meclis-i şer‘-i şerîf-i enverde sâbıkā Trabzon vâlîsi Köprülüzâde Abdurrahman Paşa’nın kethudâsı râfi‘u’l-kitâb Süleyman Ağa b. Mustafa mahzarında takrîr-i kelâm ve ta‘bîr ani’l-merâm edip bin yüz kırk iki senesinde mezbûr Süleyman Ağa paşa-yı müşârün-ileyhin kethudâsı olduğu hâlde Trabzon’da beni ahz u habs edip “katline fermân vardır” deyü tahvîf ve bi-gayr-ı hakkın yedimden dokuz bin beş yüz guruşumu kabz etmekle meblağ-ı mezbûru da‘vâ sadedinde olduğumda beynimizde muslihûn tavassut edip meblağ-ı mezbûrdan dört bin guruş üzerine benimle sulh olmağla ben dahi sulh-ı mezbûru kabûl ve mâ‘adâ beş bin beş yüz guruş da‘vâsından mezbûr Süleyman Ağa’nın zimmeti ibrâ ve ıskāt eylediğimden sonra meblağ-ı mezkûrdan iki bin guruşunu yedinden kabz edip mâ‘adâ iki bin guruş zimmetinde hakkım olmağla suâl olunup takrîri tahrîr ve hüccet olunmak murâdımdır dedikde gıbbe’s-suâl mezbûr Süleyman Ağa cevâbında fi’l-vâki‘ hâl mezbûr Hüseyin Ağa’nın bi’l-cümle takrîr-i meşrûhu üzere olup meblağ-ı mezbûr dört bin guruşdan bâkī mezbûr Hüseyin Ağa’ya elân zimmetinde iki bin guruş deyn olduğunu bi’t-tav‘i’s-sâf ikrâr ve i‘tirâf etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: Ali Ağa b. Mehmed, es-Seyyid Osman Hammâmî b. Ahmed, Mehmed Çelebi b. Mustafa, Mustafa Ağa b. İsmail, es-Seyyid Mustafa b. Ali, Mustafa b. Ömer, Molla Mustafa b. Abdullah, Mehmed Ağa b. Ömer, Salih Çelebi b. Süleyman el-muhzır.