Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 79 Hüküm no: 38 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da Mahıbülend vakfı mütevellisi tarafından kaymakam tayin edilen ve sonradan azledilen Abbaszâde Ahmed’in üzerinde olan vakfa ait paranın tamamını geri verdiği Husûs-ı âti’l-beyânın mahâllinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ Bostanzâde es-Seyyid Ahmed Efendi mahmiye-i İstanbul’da Kabasakal mahallesinde Dergâh-ı âlî kapıcıbaşılarından fahrü’l-eşbâh Reis kethudâsı Mustafa Ağa b. Receb’in sâkin olduğu menziline varıp zeyl-i vesîkada mektûbü’l-esâmî Müslimîn huzûrunda akd-i meclis-i şer‘-i nebevî ettikde civâr-ı saltanat-ı aliyyede mahrûse-i Üsküdar’da vâki‘ Şems Ahmed Paşa türbesinde medfûne ashâb-ı hayrâtdan merhûme Mahıbülend nâm sahibetü’l-hayrın nukūd-ı mevkūfe ve müsakkafâtına evlâdiyet ve meşrûtiyyet üzere <> mütevellîsi olan Abbaszâde Ahmed Ağa b. Mustafa nâm kimesne meclis-i ma‘kūd-ı mezkûrda mûmâ-ileyh Mustafa Ağa mahzarında ikrâr ve takrîr-i kelâm edip bin yüz otuz bir senesinde vakf-ı mezbûrun umûrunu rü’yete tarafından mûmâ-ileyh Mustafa Ağa’yı Kāimmakām nasb ve ta‘yîn eylediğimde vakf-ı mezbûrun nukūdundan mûmâ-ileyh Mustafa Ağa’ya istirbâh edip hâsıl olan nemâsındân ber-mûceb-i şart-ı vâkıf mürtezika vakfın vazîfelerini edâ ve teslîm etmek üzere def‘ ve teslîm ol dahi ber-vech-i meşrûh ahz u kabz eylediği dokuz yüz elli guruşu mûmâ-ileyh Mustafa Ağa sinîn-i mezkûrda istirbâh ve vakf-ı mezbûr müsakkafâtından hâsıla olan icârâtı ahz u kabz edip mezbûr mürtezikasının vezâif-i ma‘lûmelerini edâ ve teslîm etmekle mûmâ-ileyh Mustafa Ağa’yı zikrolunan kāimmakāmlıkdan azl ve ihrâc eylediğimde mûmâ-ileyh Mustafa Ağa dahi ber-vech-i muharrer makbûzu olan meblağ-ı mezbûr dokuz yüz elli guruşu bana def‘ ve teslîm ben dahi bi’t-tevliye yedinden ahz u kabz eyledim. Ba‘de’l-yevm vakf-ı mezbûrun nukūd ve icârâtından mûmâ-ileyh Mustafa Ağa yedinde bir akçe ve bir habbe bâkī kalmamışdır dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an ba‘s olunan Çukadâr Mustafa b. Abdullah ve Muhzır İbrahim b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-hü[ve’l]-vâki‘ bi’t-taleb ketb olundu. Fi’l-yevmi’t-tâsi‘ min-Şevval li-sene selâse ve erba‘în mie ve elf. Şuhûdü’l-hâl: Mahalle-i mezbûre imâmı el-Hâc Halil Efendi b. Hasan, el-Hâc Mustafa Ağa b. Ramazan, el-Hâc Halil b. Mehmed, Mustafa Ağa b. Ömer, el-Hâc Abdullah b. el-Hâc Mehmed, Salih Efendi b. Hasan el-[mü]tevellî Ahmed b. Ramazan, Ahmed Ağa b. Mehmed, Abdullah Çelebi b. Mehmed, Hüseyin Çelebi b. Ali.