Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 80 Hüküm no: 39 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın köleleri tarafından yaralanan ve tam olarak iyileşemeyen Akşehirli İsmail’in açtığı davanın sulhla sonuçlandığı Vilâyet-i Anadolu’da Akşehir kazâsı ahâlîsinde olup mahmiye-i İstanbul’da Hoca Paşa kurbünde müsâfiren sâkin İsmail Ağa b. Haydar Paşa nâm kimesne meclis-i şer‘-i şerîf-i enverde işbu hâfızü’l-kitâb es-Seyyid Ahmed Ağa b. el-Hâc İbrahim nâm kimesne mahzarında ikrâr ve takrîr-i kelâm edip mezbûr es-Seyyid Ahmed Ağa’nın hâlâ yedinde abd-i memlûkleri olan gāibûn ani’l-meclis Şahin ve Yusuf ve Zencî Evret ve Ali ve etbâ‘ından es-Seyyid Ahmed b. Abdullah ve İlyas b. Abdullah ve Hasan ve el-Hâc Ali bundan akdem vefât eden karındaşı Ali Ağa’nın eytâmlarının yedlerinde abd-i memlûkleri olan Tokmak nâm kimesneler târih-i kitâbdan yedi ay mukaddem kazâ-i mezbûrda bi-gayr-ı hakkın beni âlet-i câriha ile iki elimden ve başımı darb ve cerh etmeleriyle hâlâ cerh-i mezbûreye ber’-i tâm hâsıl olmamağıla mûceb-i şer‘iyesini mezbûrûndan taleb ve da‘vâ sadedinde fermân-ı âlî ısdâr etmiş idim. Lâkin hâlâ mezbûrûnun Âsitâne’ye ihzârlarından fâriğ olup vesâtet-i muslihîn ile da‘vâ-yı mezkûremden beni an-inkârin mezbûr es-Seyyid Ahmed Ağa ile yüz guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu mezbûr es-Seyyid Ahmed Ağa yedinden tamamen ahz u kabz eylediğimden sonra harc-ı mezkûre ve mâ-yuhdes anhü ve târih-i kitâba gelince sâir beynimizde cârî ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika de‘â[vî] ve kâffe-i mutâlebât ve eymân [ve] muhâsamâtdan gāibûn [10a] mezbûrûnun ve mezbûr es-Seyyid Ahmed Ağa’nın zimmetlerini ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi bedel-i sulh-ı mezkûra müte‘allika da‘vâdan kezâlik benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: Yusuf Efendi müfti-yi Akşehir, Sinanzâde es-Seyyid Ahmed el-kâtib, Halil Beşe Akşehirli, Hacı Mehmed Efendi el-kâtib, Osman b. Hacı Mehmed, Süleyman Ağa b. Mustafa, Hüseyin Efendi b. Ömer-i Akşehir, el-Hâc Mahmud b. Es‘ad Bey alaybeyi sâbıkā an-kazâ-i mezbûr, Osman Beşe sâkin-i kazâ-i mezbûr, Salih Bey b. Veli [an]-kazâi mezbûr