Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 82 Hüküm no: 41 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma ile Mehmed’in muhâla‘a yoluyla boşanmaları Muhâla‘a. Mahmiye-i İstanbul’da Defterdâr Ahmed Çelebi mahallesinde sâkine olup zâtı mahalle-i mezbûre imâmı Salih Efendi b. Mehmed ve es-Seyyid Hasan Efendi b. Mustafa nâm kimesneler ta‘rîfleriyle mu‘arrefe olan Fâtıma bt. Osman nâm hatun meclis-i şer‘-i şerîf-i enverde zevc-i dâhili bâ‘isü hâze’l-kitâb el-Hâc Mehmed b. İbrahim mahzarında ikrâr ve takrîr-i kelâm edip zevcim mezbûr el-Hâc Mehmed ile beynimizde hüsn-i mu‘âşeretimiz olmamağla zimmetinde mütekarrir ve ma‘kūdün aleyh olan dört bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr el-Hâc Mehmed ile muhâla‘a-i sahîha-i şer‘iye ile hul‘ olduğumda ol dahi [10b] ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika da‘vâdan her birimiz âharın zimmetini ibrâ-i âm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: Salih Efendi b. Mehmed imâm-ı mahalle-i mezbûr, es-Seyyid Hasan Efendi b. Mustafa, Mehmed Çelebi b. Abdullah tahtacı, İbrahim Çelebi b. Mustafa du‘âcı, Kasım Çelebi el-muhzır, Yakub b. Abdullah el-muhzır.