Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 83 Hüküm no: 42 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zâim Mehmed Ağa vakfından Kürkçübaşı mahallesindeki vakıf evin satıldığı Ashâb-ı hayrâtdan merhûm Za‘îm Mehmed Ağa nâm sahibü’l-hayrın mahmiye-i İstanbul’da Cerrâhpaşa kurbünde Kürkçübaşı mahallesinde vâki‘ İhlâshân odaları demekle ma‘rûf odalardan süknâya muhtâc sulehâya meşrûta vakfı olup bir tarafdan Bâkīzâde İbrahim Ağa bahçesi ve bir tarafdan Hüseyin Çavuşzâde Mustafa Ağa bahçesi ve bir tarafdan vakf-ı mezbûrdan Tarakçı İbrahim Çelebi tasarrufunda olan menzil ve bir tarafdan yine vakf-ı mezbûrdan ba‘zen Ahmed Beşe menzili ve ba‘zen tarîk-ı hâs ile mahdûd fevkāni bir bâb oda ve bir sofa ve tahtânî bir bâb oda ve bir sofa ve bodrum ve kenîf ve havluyu müştemil menzile tevcîh-i hâkimü’ş-şer‘le mutasarrıf olan Mehmed Çelebi b. Ahmed nâm kimesne meclis-i şer‘-i şerîf-i enverde işbu râfi‘u’l-kitâb İsmail Çelebi b. Hasan mahzarında ikrâr ve takrîr-i kelâm edip işbu hüccet-i şer‘iye mantûkunca menzil-i mahdûd-ı mezkûrun ebniye-i mezkûresi yedimde mülk ve hakkım olmağla ebniye-i mezkûreyi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr İsmail Çelebi’ye yüz guruşa bey‘ ve temlîk ve teslîm ve arsasından kasr-ı yed eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yüz guruşu mezbûr İsmail Çelebi yedinden tamamen ahz u kabz eyledim dedikde gıbbe’t-tasdîkı’ş-şer‘î mezbûr İsmail Çelebi sulehâdan ve süknâya muhtâc idiği zeyl-i kitâbda muharrerü’l-esâmî Müslimîn haberleriyle müte‘ayyin olmağın arsa-i mahdûd-ı mezkûru cânib-i şer‘den ber-mûceb-i şart-ı vâkıf mezbûr İsmail Çelebi’ye tevcîh ve tasarrufiʼçün işbu vesîka ketb ü imlâ ve yedine def‘ ü i‘tâ olundu. Fi’l-yevmi’t-tâsi‘ min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: İmâm Ahmed Efendi b. Mustafa, Mustafa Beşe b. Yusuf, Halil Çelebi b. İbrahi, İshak Beşe b. Ali, İbrahim b. Ali, İbrahim b. el-Hâc Ahmed, Abdi Çelebi b. Ali, Mustafa b. Hüseyin, Süleyman b. Ömer, Abdurrahim Çelebi b. Ahmed.