Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 83 Hüküm no: 43 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa ile Abdullah Ağa arasında Zile voyvodalığı gelirinin tahsilinde çıkan anlaşmazlık Bâ-imzâ-i hazret-i Efendi, ikrâr-ı deyn. Mahmiye-i İstanbul’da Cibali kurbünde sâkin râfi‘u’l-kitâb Abdullah Ağa b. Süleyman nâm kimesne meclis-i şer‘-i şerîf-i enverde Süleyman Ağa b. Mustafa nâm kimesne mahzarında üzerine da‘vâ ve takrîr-i kelâm edip bin yüz kırk üç senesinde Zile voyvodalığı mezbûr Süleyman Ağa’nın taht-ı iltizâmında olmağla voyvodalığa tâbi‘ pergende ve bâdî-i havâsını merkūm Süleyman Ağa sekiz yüz guruşa bana iltizâm ve ben dahi der-uhde ve iltizâm eylediğimde yedimden meblağ-ı mezbûr sekiz yüz guruşu kabz ve tesellüm eyledikden sonra fitne zuhûr etmekle zabtı müyesser olmamağın yedimde merkūm Süleyman Ağa’nın bi-gayr-ı hakkın makbûzu olan sekiz yüz guruşu merkūm Süleyman Ağa’dan taleb ederim suâl olunup edâsıyla tenbîh olunmak murâdımdır dedikde gıbbe’s-suâl merkūm Süleyman Ağa <> cevâbında fi’l-vâki‘ hâl müdde‘î-yi merkūm Abdullah Ağa’nın takrîr-i meşrûhu üzere olup lâkin yedinde ancak bedel-i iltizâm deyü bi-gayr-ı hakkın yedi yüz elli guruş kabz eyledim deyü i‘tirâf ve elli guruş kabzını inkâr edicek müdde‘î-yi merkūm Abdullah Ağa’dan ziyâde <> müdde‘âsına mutâbık beyyine taleb olundukda mezbûr Abdullah Ağa ikāmet-i beyyine için istimhâl etmekle mehl-i şer‘î ile ba‘de’l-imhâl ikrârı mertebesi olan yedi yüz elli guruşu müdde‘î-yi merkūm Abdullah Ağa’ya edâya mezbûr Süleyman Ağa’ya ba‘de’t-tenbîh mâ-vaka‘a bi’t-taleb ketb olundu. Fi’l-yevmi’l-hâmis aşer min-Ramazan li-sene selâse ve erba‘în sene 1143. Şuhûdü’l-hâl: Fahrü’l-kuzât Abdullah b. Abdülkadir, Salih Çelebi b. Süleyman, Mehmed Ağa kethudâ-yı muhzırân, Mehmed Çelebi b. Abdullah.