Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 84 Hüküm no: 44 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirneli Hasan Beşe’nin Ahmed Usta’da olan alacağını aldığı İkrâr-ı deyn. Mahrûse-i Edirne mahallâtından Kasım Paşa-yı cedîd mahallesi sükkânından olup mahmiye-i İstanbul’da Ağakapısı’nda müsâfiren sâkin Hasan Beşe b. el-Hâc Mehmed nâm kimesne meclis-i şer‘-i şerîf-i enverde işbu râfi‘u’l-kitâb Ahmed Usta b. İbrahim nâm kimesne mahzarında ikrâr ve takrîr-i kelâm edip mezbûr Ahmed Usta zimmetinde cihet-i deyn-i şer‘îden iki yüz elli guruş hakkım olmağla meblağ-ı mezbûr iki yüz elli guruşu mezbûr Ahmed Usta tamamen bana def‘ ü teslîm eylediğinde ben dahi meblağ-ı mezbûru ahz u kabz eylediğimden sonra târih-i kitâba gelince sâir beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Kantarcıbaşı Ahmed b. Abdullah, Mestcibaşı Hasan b. Musa, Gecekuşu Kazzâzbaşı Mehmed b. Abdullah, Derzi Ali Çelebi b. Mustafa, Mehmed b. Osman, Sucukcu Hüseyin Çelebi b. İbrahim, Berber es-Seyyid Ahmed Çelebi b. es-Seyyid Mehmed, Attar Ahmed Çelebi b. Şa‘ban, Berber es-Seyyid Mehmed Çelebi b. es-Seyyid Ahmed, Kumkapılı Ahmed Efendi.