Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 85 Hüküm no: 45 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kedegralı Mustafa’nın yanında çalıştığı Mehmed Efendi ile alacak hususunda anlaştığı Vilâyet-i Anadolu’da Kedegra kazâsı ahâlîsinden olup mahmiye-i İstanbul’da vâki‘ Za‘ferâncılar Hânı’nda müsâfiren sâkin Mustafa b. Mehmed nâm kimesne meclis-i şer‘-i hatîr-i lâzımü’t-tevkīrde yine kazâ-i mezbûre ahâlîsinden Mehmed Efendi b. Hüseyin nâm kimesne mahzarında ikrâr ve takrîr-i kelâm edip târih-i kitâbdan on ay mukaddem mezbûr Mehmed Efendi “gel bana hizmet eyle her üç ay tamamında sana ellişer guruş ücret vereyim” demekle ben dahi kendiye dokuz ay hizmet edip şuhûr-ı mezkûrede müctemi‘ cem‘an yüz elli guruş ücretimi mezbûr Mehmed Efendi’den taleb ve da‘vâ eylediğimde ol dahi cevâbında “ancak sana ayda ikişer buçuk guruş ücret vermek üzere kavil eyledim” deyü ikrâr ziyâdeyi inkâr edicek beynimizde nizâ‘-ı küllî cereyân etmişidi. El-hâletü-hâzihi beynimize muslihûn tavassut edip da‘vâ-yı mezkûremden mezbûr Mehmed Efendi ile elli guruş üzerine inşâ-i akd-i sulh eylediklerinde ben dahi sulh-ı mezbûru kabûl eylediğimden sonra mezbûr Mehmed Efendi’ye sarık bahâsından ber-mûceb-i i‘lâm mahkûmun-bih zimmetimde deynim olan doksan yedi buçuk guruşun kırk yedi buçuk guruşunu işbu meclis-i şer‘de kendiye edâ ve teslîm ol dahi yedimden ba‘de’l-ahz mâ‘adâsı olan elli guruşu mezbûr Mehmed Efendi bedel-i sulh-ı mezkûre takās ve mahsûb eylediğinde ben dahi mukāssa ve kabûl edip ücret-i mezkûra müte‘allika âmme-i da‘vâdan ben mezbûr Mehmed Efendi’nin zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi kezâlik zikrolunan doksan yedi buçuk guruş da‘vâsına müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Ali Bey b. Mehmed, Hasan Bey b. Abdulkadir, Mehmed Beşe b. Ahmed, Mehmed Çelebi b. Abdullah.