Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 85 Hüküm no: 46 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenice-i Vardar’ın Çekre köyünde bulunan çiftliğin Felemenk Tercümanı tarafından Mustafa Ağa’ya satıldığı Mübâya‘a-i çiftlik ve tarla ve hayvanât. Mahrûse-i Galata muzâfâtından Ortaköy kasabası ahâlîsinden hâlâ Felemenk tercümanı olan Roben v. İlya Yahûdî meclis-i şer‘-i hatîr-i lâzımü’t-tevkīrde medîne-i Selanik sâkinlerinden işbu sahibü’l-kitâb Mustafa Ağa b. el-Hâc Osman b. Abdurrahman nâm kimesne <> tarafından husûs-ı âti’z-zikrin tasdîka vekîl olduğu İsmail Çelebi b. Kasım ve Ahmed Beşe b. Mustafa şehâdetleriyle sâbit ve sübût-i vekâletine hükm-i şer‘î lâhık olan Hasan Ağa b. Mehmed nâm kimesne mahzarında ikrâr-ı tâm ve takrîr-i kelâm edip edip akd-i âti’z-zikrin sudûruna değin silk-i mülk-i sahîhimde münselik olup medîne-i Selanik Sancağı’nda Yenice-i Vardar kazâsına tâbi‘ Çekre nâm karyede vâki‘ lede’l-ahâlî ve’l-cîrân ma‘lûmü’l-hudûd etrâf-ı erba‘adan taş duvar ve yirmi dönüm duhan bahçesi ve otuz iki çiftçi odası ve üç anbâr ve üç ahır ve üç samanlık ve bir güğercinlik ile çiftlik-i mezbûr dâhilinde mevcûd elli beş karasığır öküzü ve beş inek ve on aded düğe buzağı ve üç aded poyata ve altı aded araba ve on beş saban demiri ve elli arı kovanı bi-cümleti’t-tevâbi‘ ve’l-levâhık tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile müvekkil-i mûmâ-ileyh Mustafa Ağa’ya bi-safkatin vâhidetin bin guruşa bey‘ ve temlîk ve çiftlik-i mezbûra teba‘iyyet ile zirâ‘at olunur merhûm Gāzi Evrenos vakfından olup taht-ı tasarrufumda olan mevâzi‘-i müte‘addidede vâki‘ dört bin dönüm tarla ve <> ma‘lûmü’l-mikdâr mezrû‘âtıyla ma‘lûmü’l-hudûd koyun kışlağımı bâ-ma‘rifet-i mütevellî bin altı yüz elli guruş bedel mukābelesinde müvekkil-i mûmâ-ileyh Mustafa Ağa’ya ferâğ ve tefvîz eylediğimde ol dahi ber-vech-i muharrer iştirâ ve temellük ve tefevvüz ve kabûl eylediğinden sonra semen-i mezbûr bin guruş ile bedel-i merkūm bin altı yüz elli guruş ki cem‘an iki bin altı yüz elli guruşu müvekkil-i mûmâ-ileyh Mustafa Ağa’nın mâlından olmak üzere vekîl-i mezbûr Hasan Ağa yedinden tamamen ahz u kabz eyledim. Min-ba‘d zikrolunan çiftlik ve hayvanât ve âlât müvekkil-i mûmâ-ileyh Mustafa Ağa’nın mülk-i müşterâsı ve mârrü’z-zikr arâzi ve kışlak dâhil-i havza-i tasarruf olup mahâllinde kabz ve tesellüm ve tasarrufa müvekkil-i mûmâ-ileyh Mustafa Ağa’yı taslît eyledim. Zikr olunan çiftlik ve hayvanât ve âlât ve arâzi ve kışlakda kat‘a benim alâka ve medhalim kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene 1143. Şuhûdü’l-hâl: Mehmed Efendi b. Ataullah, Feyzullah Efendi b. Ebûbekir Efendi, Tahtacı Mehmed Çelebi b. Abdullah, Hüseyin Efendi b. Mehmed Ağa, Şâtır Ali Ağa tâbi‘-i kethudâ-yı Sadrazam, Mehder Ali Ağa b. ( ), Ali Efendi b. ( ), Mustafa Çelebi b. Abdülaziz, İbrahim Çelebi b. ( ) el-muhzır, Mustafa Çelebi tâbi‘-i Ömer Efendi.