.:: İstanbul Kadı Sicilleri ::.


Adalar Mahkemesi 1 Numaralı Sicil (H. 1178-1184 / M. 1764-1771)
cilt: 75, sayfa: 65
Hüküm no: 58
Orijinal metin no: [11b-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ölen Vilas’ın terekesinin kardeşleri arasındaki hisse satışının gerçekleştirildiği

Medîne-i Üsküdar’a muzâfe Adalar nâhiyesine tâbi‘ Kartal kasabasında sâkine, mütemekkine olup şahsı vech-i şer‘î üzere mu‘arrefe olan Meryem ve Margarit ibnetey Agop Nasrâniyeler meclis-i şer‘-i hatîr-i lâzimü’t-tevkīrde ve li-ebeveyn er karındaşları olup işbu râfi‘ü’r-rakīm Markos ve Kitagos muvâcehelerinde her biri ikrâr ve takrîr-i kelâm [edip] bundan akdem karındaşımız olup hâlik olan Vilas zimmîden altı sehmden i‘tibârıyla birer sehmi bize ve ikişer sehmi merkūmân Markos ve Kitagos’a isâbet ve intkāl eden kasaba-i mezbûrda vâki‘ etrâf-ı erba‘ası Vartan zevcesi menzili ve Bedros zimmî menzili ve karındaşımız merkūm Kitagos menzili ve Karabet Dülger veresesi menzili ve tarîk-i âm ile mahdûd fevkānî iki bâb oda ve tahtında ahır ve bir mikdâr avlu ve kazgan ocağı ve merkūm Kitagos ile müşterek bi’r-i mâ ve yetmiş zirâ‘ bahçeyi müştemil mülk menzile dört yüz elli guruş kıymet takvîm olunup takvîmi meblağ-ı mezkûrdan biz yetmiş beş guruş hissemizi nakden yedlerinden tamâmen ba‘de’l-ahz ve’l-kabz ve yine Savak nâm mevâzi‘de vâki‘ lede’l-ahâlî ve’l-cîrân ma‘lûmü’l-hudûd altı dönüm kış bağından altı yüz çubuğunu ve yine Maldepe toprağında Cevizler kurbünde vâki‘ altı dönüm <> çavuş bağından altı yüz çubuğunu ve yine Uluyol altında vâki‘ dört buçuk dönüm çavuş ve dut bağından altı yüz çubuğunu ve yine vakıf toprağında Draman kurbünde vâki‘ üç dönüm yerli bağından üç yüz çubuğunu ba‘de’l-ifrâz alâmât-ı fâsıla ve dal vaz‘ıyla bizim hissemiz içün bi’t-terâzî ta‘yîn ve tahsîs ve teslîm biz dahi ber-vech-i muharrer ahz ü kabz ve tesellüm ve kabûl edüp fîmâ-ba‘d menzil-i mezbûrun mecmû‘unda ve bağ-ı mezbûrûnun ta‘yîn olunan hisselerimizden mâ‘adâsında kat‘â ve kātıbeten ve dahi beynimizde ma‘lûm eşyâ-yı mütenevvi‘adan sihâm-ı mezkûr üzere hisselerimizi yedlerinden tamâmen ahz ü kabz eyleyüp kezâlik eşyâ-yı mütenevvi‘adan ırsen alâka ve medhalimiz kalmayup husûs-ı tereke-i hâlik karındaşımız merkūma müte‘allıka âmme-i de‘âvî ve kâffe-i mütâlebât ve eymân-ı muhâsamâtdan karındaşımız merkūmân Markos ve Kitagos’[un] zimmetlerini ibrâ ve iskāt eyleyüp her birimiz âharın ibrâsını kabûl eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Fî 4 Recebi’l-ferd sene [1]179

Şuhûdü’l-hâl: İshak, Berber Memiş, Duhâni Mehmed, Nalband İbrahim, Ahmed Efendi.

Yazıcı Kirkor, Aci Kevork, Ohan v. Marat, Bogos v. Bedros, Terzi Kevork, Terzi Avakim.