Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 86 Hüküm no: 47 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da bulunan Mehmed Ağa’ya ait vakıf bağda bulunan molozların taşınması Medîne-i Üsküdar’da ( ) mahallesinde sâkin Mehmed Çelebi b. Mustafa meclis-i şer‘-i şerîf-i enverde mefharu’l-emâcid ve’l-ekârim hâfızü hâze’l-kitâb Yeğen Mehmed Ağa b. Abdurrahman tarafından husûs-ı âti’z-zikre vekîl olduğu İmâm Osman Efendi b. ( ) ve Süleyman Ağa b. Ahmed şehâdetleri ile sâbit olan Süleyman Ağa b. Abdullah mahzarında ikrâr-ı tâm ve takrîr-i kelâm edip bundan akdem müvekkil-i mûmâ-ileyh medîne-i mezbûrede kâin menziline icrâ için hafr ve ta‘mîr eylediği medîne-i mezkûre bağları hilâlinde ( ) vakfından müvekkil-i mûmâ-ileyh tasarruflarında olan bağda vâki‘ on aded kuyularından ihrâc olunan gerek bağda ve gerek tarîk-ı âmda olan ma‘lûmü’l-mikdâr molozlarını ref‘ etmek için altmış guruşa beni istîcâr eylediğinde ben dahi nefsimi ber-vech-i muharrer îcâr etmişidim. Hâlâ mârrü’z-zikr molozları ref‘ ve tekmîl eylediğimden sonra ücret-i mezkûre altmış guruşu müvekkil-i mûmâ-ileyh bana def‘ ve teslîm ben dahi yedinden tamamen ba‘de’l-ahz ve’l-kabz, husûs-ı mezkûre müte‘allika âmme-i da‘vâ ve kâffe-i mutâlebâtdan müvekkil-i mûmâ-ileyhin zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 11 L [Şevval] [1]143. Şuhûdü’l-hâl: Başkâtib Mustafa Efendi, Abdullah b. Ahmed, Mehmed Çelebi b. Abdullah, Mehmed Efendi b. İbrahim, Mustafa b. Abdullah, Hasan b. Mustafa, es-Seyyid Mehmed b. Bayram, Mustafa b. Hasan.