Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 87 Hüküm no: 48 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakibü’l-eşrâf Ebu Said Efendi’nin geliri ile ilgili anlaşmazlığın sulhla neticelendiği İbrâ. Mahmiye-i İstanbul’da Molla Şeref mahallesinde sâkin sâbıkā Balıkesir kazâsında nâib olan es-Seyyid Abdullah Efendi b. Musa meclis-i şer‘-i hatîr-i lâzımü’t-tevkīrde işbu hâfızü’l-kitâb Ali Efendi b. Hasan mahzarında ikrâr-ı tâm ve takrîr-i kelâm edip kethudâları olduğu bi’l-fi‘il nakībü’l-eşrâf umdetü’l-mevâli’l-izâm sa‘âdetli semâhatli Ebû Said es-Seyyid Mehmed Efendi hazretlerinin arpalıkları olan Balıkesri kazâsı niyâbeti için mahsûle takās olmak üzere bi’l-emâne beş yüz altmış guruş hazır bi’l-meclis Süleyman Ağa yediyle işbu mezbûr Ali Efendi’ye def‘ ve teslîm etmişidim. Sene selâse ve erba‘în ve mie ve elf Receb-i şerîfi ve Şa‘bâni’l-mübâreki aylarından niyâbet-i mezbûreyi zabt ve iki ayda iki yüz seksen guruş hâsıl olup seksen beş guruş mesârifim ihrâc olundukdan sonra yüz doksan beş guruş kalıp şikâyet ile ma‘zûl olduğumda istifâ olunmayan bâkī üç yüz altmış beş guruşu işbu Ali Efendi’den taleb ve da‘vâ sadedinde iken beynimizde ba‘de’l-münâza‘a muslihûn tavassutuyla taleb eylediğim meblağ-ı mezbûr üç yüz altmış beş guruş da‘vâsından iki yüz yirmi guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh iki yüz yirmi guruşu Ali Efendi yedinden tamamen ahz u kabz eyledim. Fîmâ ba‘d zikrolunan beş yüz altmış guruşa müte‘allika âmme-i da‘vâdan müşârün-ileyh nakīb efendi hazretlerinin ve kethudâları Ali Efendi’nin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim. Husûs-ı mezkûra ve gayra müte‘allika vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î mezbûr Süleyman Ağa b. Abdurrahman meclis-i mezkûrda işbu merkūm Ali Efendi mahzarında ikrâr ve takrîr-i kelâm edip benim yedimle husûs-ı mezkûr için def‘ ve teslîm eylediğim meblağ-ı mezbûr beş yüz altmış guruşda benim alâka ve medhalim olmayıp ben dahi müşârün-ileyh nakīb efendi hazretlerinin ve kethudâları işbu mezbûr Ali Efendi’nin zimmetlerini ibrâ-yı âmm-ı râfi‘u’l-hısâm ile ibrâ ve ıskāt eyledim dedikde mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Salih Efendi b. Mustafa, Molla Mehmed b. İbrahim, Molla Mehmed b. İbrahim, el-Hâc Halil Çavuş b. Abdullah, es-Seyyid Ebûbekir Çavuş, es-Seyyid Hasan Çavuş, Mehmed Efendi b. Abdurrahman, Sinanzâde es-Seyyid Ahmed Efendi, Mustafa Efendi b. Yunus, Ahmed Efendi b. Mehmed, el-Hâc Mehmed Efendi b. Hasan.