Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 88 Hüküm no: 49 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa ile Ahmed Bey’in muhâlaa yoluyla boşanmaları İbrâ. Mahmiye-i İstanbul’da Aksaray kurbünde Camcılar mahallesi sâkinelerinden Fâtıma bt. Mustafa b. Abdullah nâm hatunun üveği babası ve tarafından hul‘-ı âti’z-zikri ikrâra vekîl olduğu zât-ı mezbûre[yi] ârifân Mustafa Ağa b. Mehmed ve Hasan b. Hüseyin nâm kimesneler şehâdetleriyle şer‘an sâbit olan Mehmed Efendi b. Mustafa nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i dâhili işbu hâze’l-kitâb Ahmed Bey b. el-Hâc Mehmed nâm kimesne mahzarında bi’l-vekâle ikrâr ve takrîr-i kelâm edip mezbûr Ahmed Bey müvekkilem mezbûrenin zevci olup beynlerinde hüsn-i mu‘âşeretleri olmamağla zimmetinde mütekarrir ve ma‘kūdün-aleyh <> iki bin beş yüz akçe mehr-i müeccelinin sekiz yüz kırk akçesini müvekkilem mezbûreye def‘ ü teslîm ol dahi yedinden ahz u kabz eylediğinden sonra mâ‘adâsı olan bin altı yüz altmış akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzere zevci mezbûr Ahmed Bey ile muhâla‘a-i sahîha-i şer‘iye ile muhâla‘a eylediklerinde ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete vesâir târih-i kitâba gelince beynlerinde cereyân eden hukūk-ı ma‘lûme ve mechûleye müte‘allika âmme-i da‘vâdan her birileri âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem sene 1143. Şuhûdü’l-hâl: es-Seyyid el-Hâc Abdurrahman b. es-Seyyid el-Hâc Mehmed, Müezzin Molla Mehmed b. Himmet, Süleyman Çelebi b. Mehmed, İbrahim Çelebi b. Hüseyin, İbrahim b. Hasan ve diğer İbrahim yüzdeci, Kādızâde İbrahim du‘âcı, Mehmed Çelebi b. Abdullah tahtabaşı.