Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 89 Hüküm no: 50 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce bt. Abdullah’ın küçük oğlu için eski kocası Ahmed Beşe’den nafaka talebi Mahmiye-i İstanbul’da Küçük Mustafa Paşa kurbünde Üsküblü mahallesinde sâkine Hadîce bt. Abdullah nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde takrîr-i kelâm ve ta‘bîr ani’l-merâm edip zevc-i sâbıkım gāib ani’l-beled Şişeci Ahmed Beşe b. Hüseyin b. Abdullah’ın firâşından hâsıl ve benden mütevellide olup bi-hakkı’l-hıdâne hacr ve terbiyemde işbu sadr-ı sagīr oğlum Süleyman’ın mâlı olmayıp nafaka ve kisve-bahâsıʼçün babası mezbûr Ahmed Beşe üzerine kıbel-i şer‘den kadr-ı ma‘rûf akçe farz ve takdîr olunması matlûbumdur dedikde hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi sagīr-i mezbûr Süleyman’ın ber-vech-i muharrer nafaka ve kisve-bahâsıʼçün babası gāib-i mezbûr Ahmed Beşe târih-i kitâbdan beher yevm sekizer akçe farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisvesiʼçün harc ve sarfa lede’l-iktizâ istidâneye ve inde’z-zafer babası gāib-i mezbûr Ahmed Beşe üzerine rücû‘a mezbûre Hadîce Hatun’a izin verilmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem li-sene 1143. Şuhûdü’l-hâl: Mustafa Çelebi b. Hüseyin, Mustafa Çelebi b. Abdullah tâbi‘-i nâib efendi, Mehmed Çelebi b. Abdullah bölükbaşı, İbrahim Çelebi b. Mustafa du‘âcı, Köprücü Abdullah Çelebi muhzır, Kasım Mehmed Çelebi el-muhzır.