Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 89 Hüküm no: 51 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşköprü Yazı köyüne giden Ahmed Beşe’nin karısı Hadîce‘yi bâyinen boşadığı Mahmiye-i İstanbul’da Küçük Mustafa Paşa kurbünde Üskübî mahallesinde sâkine Hadîce bt. Abdullah nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde mahalle-i mezbûre sâkinlerinden Yorganî Molla Mehmed b. Ahmed nâm kimesne mahzarında üzerine da‘vâ ve takrîr-i kelâm edip zevcim gāib ani’l-meclis Şişeci Ahmed Beşe b. Hüseyin b. Abdullah târih-i kitâbdan on üç ay mukaddem vilâyet-i Anadolu’da Taşköprü kazâsına tâbi‘ Yazı nâm karyeye gider oldukda ayda ikişer guruş nafakama mezbûr Yorganî Molla Mehmed bi’l-emr ve’l-kabûl kefîl olmağla târih-i mezbûrdan on üç ayda müctemi‘ yirmi altı guruşun dört guruşunu bana edâ ve teslîm ben dahi mezbûr Molla Mehmed yedinden ahz u kabz edip yirmi iki guruşu bâkī kalmağın mezbûr Molla Mehmed’e suâl olunup meblağ-ı bâkī-i mezbûru bana edâ ve teslîme tenbîh olunması matlûbumdur dedikde gıbbe’s-suâl merkūm Molla Mehmed cevâbında fi’l-hakīka kabza ve müdde‘iye-i mezbûre Hadîce Hatun’un takrîr-i meşrûhu üzerine olduğunu ikrâr lâkin müdde‘iye-i mezbûrenin zevci gāib-i mezbûr Şişeci Ahmed Beşe ber-vech-i muharrer târih-i merkūmda diyâr-ı âhara gider oldukda târih-i mezkûrdan iki ay tamamında zevcem mezbûre Hadîce Hatun’a gelip mülâkī olmazsam zevcem mezbûre benden talâk-ı bâyin ile mutallaka olsun deyü şuhûd mahzarında şart ve ta‘lîk edip mezbûr Şişeci Ahmed Beşe târih-i kitâba gelince gelip mezbûreye mülâkī olmamağın şart-ı mezkûrun vukū‘una binâen mezbûre Hadîce Hatun bâyine olmuşdur deyü def‘ edicek gıbbe’l-istintâk ve’l-inkâr merkūm Molla Mehmed’den def‘ini mübeyyine beyyine taleb olundukda udûl-i ahrâr-ı ricâl-i Müslimînden ve mahalle-i mezbûre sükkânından Mustafa Çelebi b. Hüseyin ile nisâ-i sâlihâtdan Âişe bt. Abdullah ve Kerîme bt. Mustafa nâm hatunlar li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mezbûre Hadice’nin zevci gāib-i mezbûr Şişeci Ahmed Beşe b. Hüseyin b. Abdullah târih-i kitâbdan on üç ay mukaddem vilâyet-i Anadolu’da Taşköprü kazâsına tâbi‘ Yazı nâm karyeye gider oldukda târih-i mezbûrdan iki ay tamamında gelip zevcem mezbûre Hadîce Hatun’a mülâkī olmazsam zevcem mezbûre Hadîce benden talâk-ı bâyin ile mutallaka olsun deyü bizim huzûrumuzda şart ve ta‘lîk edip ve mezbûr Şişeci Ahmed Beşe târih-i kitâba gelince mezbûreye gelip mülâkī olmamağla şart-ı mezkûrun vukū‘una binâen mezbûre Hadîce merkūm Şişeci Ahmed Beşe’den ber-vech-i muharrer mübânedir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm müdde‘iye-i mezbûre Hadîce Hatun merkūm Yorganî Molla Mehmed’e bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: eş-Şâhidûnü’s-sâbıkūn.