Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 90 Hüküm no: 52 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saruhan Kayacık mukataası ahalisinin mukataa sahibi Ser-mehteran Abdullah Ağa’nın mültezimi ve adamlarından şikayetinin sulhla sonuçlandığı Vilâyet-i Anadolu’da Saruhan Sancağı’nda Kayacık nâm mukāta‘a ahâlîsinden Hamza b. Mahmud ve es-Seyyid Halil b. ( ) ve Mehmed b. Hüseyin ve İbrahim b. Ahmed ve Ali b. Musa ve Halil b. Ali ve Mustafa b. İbrahim ve Halil b. Hamza nâm kimesneler meclis-i şer‘-i şerîf-i enverde mukāta‘a-i mezbûra ber-vech-i mâlikâne mutasarrıf olan fahrü’l-eşbâh Ser-mehterân-ı hâssa el-Hâc Abdullah Ağa tarafından mültezimi el-Hâc İbrahim’in etbâ‘ından Bayrakdâr Yusuf b. Ahmed ve İsmail b. Turgud nâm kimesneler mahzarlarında her biri ikrâr ve takrîr-i kelâm edip [13a] bazı müfsîd ve muharrik tahrîkiyle mültezim-i mezbûr el-Hâc İbrahim Ağa’dan Devlet-i aliyye’ye teşekkîye âzim ve râhi olduğumuzda esnâ-i tarîkde mezbûrân Bayrakdâr Yusuf ve İsmail bizi ahz u habs ve yedimizden yüz guruşumuzu gasben kabz etmişidi deyü bundan akdem da‘vâya tesâddî eylemişidik. El-hâletü-hâzihi da‘vâ-yı mezkûremizden her birimiz fâriğ olup mezbûrân Bayrakdâr Yusuf ve İsmail ve ağaları mezbûrân el-Hâc İbrahim Ağa ve Mehterbaşı el-Hâc Abdullah Ağa’nın âmme-i de‘â[vî ve ] mutâlebât ve eymân ve muhâsamâtdan zimmetlerini ibrâ ve ıskāt eyledik. Ba‘de’l-yevm mezbûrûn ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Mustafa b. Mehmed, İbrahim b. Hasan, Ali b. İbrahim, Mehmed b. İbrahim, Halil Sipâhi b. İbrahim b. Mehmed, Hüseyin b. Ahmed, Ali b. Abdullah, İbrahim Ağa b. el-Hâc Ahmed mehter-i ha[y]me-i sadr-ı âlî, Mehmed Kethudâ el-mübâşir.