Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 91 Hüküm no: 53 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Paşa’nın Mısırın Kalyub kazasına bağlı Şalkan köyünde bulunan hissesinin kullanım hakkını Ömer Ağa’ya bıraktığı Sadrazam-ı sâbık merhûm İbrahim Paşa’nın necb-i necîb ve veled-i lebîbi olup hâlâ Hanya muhâfızı devletlü sa‘âdetlü vezîr-i mükerrem Mehmed Paşa hazretleri taraflarından zikri câ’î karyeyi ferâğa vekîl olduğu Osman Ağa b. Mehmed ve Süleyman Efendi b. Abdülkadir nâm kimesneler şehâdetleriyle şer‘an sâbit olan Mehmed Ağa b. Muslu nâm kimesne meclis-i şer‘-i hatîr-i lâzımü’t-tevkīrde hâlâ Saray-ı hümâyûn’da hazînedâr-ı şehriyârî olan kıdvetü’l-havâs ve’l-mukarrebîn sahibü’l-izzi ve’t-temkîn mu‘temedü’l-mülûk ve’s-selâtîn râfi‘u’l-kitâbi’l-müstetâb Ömer Ağa b. Abdürrezzak hazretleri taraflarından tasdîka vekîlleri olan Ali Ağa b. Mustafa mahzarında ikrâr ve takrîr-i kelâm edip müvekkilim vezîr-i müşârün-ileyh Mehmed Paşa hazretlerinin iklîm-i Mısır’da vilâyet-i Kalyub’da Şalkan nâm karyede bi-hakkın nısf mutasarrıf oldukları on iki kırat hisselerinin vekâletim hasebiyle mûmâ-ileyh Ömer Ağa hazretlerine ferâğ-ı mu‘teber-i kat‘î ile târih-i kitâb günü ferâğat ve kasr-ı yed eyledim. Ba‘de’l-yevm karye-i merkūmede müvekkilim vezîr-i müşârün-ileyh hazretlerinin kat‘a alâka ve medhali kalmayıp mûmâ-ileyh Ömer Ağa hazretlerinin dâhil-i havza-i tasarrufu olmuşdur. Emsâli gibi mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şevval sene 1143. Şuhûdü’l-hâl: Fahrü’l-kuzât Abdullah Efendi Musazâde, Mehmed Efendi b. İbrahim Müezzinzâde, Mehmed Ağa b. Mehmed kethudâ-yı mu[h]zırân, Abdullah Çelebi b. Mehmed.