Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 92 Hüküm no: 54 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdisubaşı mahallesinden Eleni bt. Panayot’un açtığı mehir davasından vazgeçtiği Mahmiye-i İstanbul’da Abdi Subaşı mahallesi sâkinelerinden olup zâtı mahalle-i mezbûre imâmı el-Hâc Mustafa Efendi b. Abdullah ve Berber Ebûbekir Çelebi b. Hasan ta‘rîfleriyle mu‘arrefe olan Eleni bt. Panayot nâm Nasrâniye meclis-i şer‘-i şerîf-i lâzımü’t-tevkīrde kendi nefsinden asîl ve zevci İstimat v. Mihal nâm zimmî tarafından husûs-ı âti’l-beyâna vekîl olduğu Uncu Yani v. Nikola ve Tanaki v. Yani zimmîler <<şehâdetleri>> şehâdetleriyle sâbit ve sübût-i vekâletine hükm-i şer‘î lâhık olan râfi‘ü hâzihi’l-vesîka üveği oğlu Yorgaki ve üveği güveğisi Delot v. Lazari nâm zimmîler muvâcehelerinde [13b] ikrâr ve takrîr-i kelâm edip bundan akdem mezbûr Yorgaki ve kız karındaşı menzillerinde olan ber-mûceb-i defter-i müfredât eşyâ-i ma‘lûmemi mez[bûr] Yorgaki tamamen ber-mûceb-i i‘lâm bana def‘ ve teslîm ben dahi yedinden cihet-i karzdan dört bin guruş hakkım olup meblağ-ı mezbûre merkūmân Yo[r]gaki ve Delot kefîl olmuşlar idi deyü üzerlerine tesâddî eylediğim da‘vâmda mubtıle olmamla da‘vâ-yı mezkûremden fâriğa ve zikrolunan temessükü meclis-i şer‘de şak ve husûs-ı mezkûre ve zevcem müvekkil-i mezbûrdan iddi‘â eylediğim bin guruş mehrime ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve muhâsamâtdan ben zevcim müvekkilimiz mezbûr İstimat ile üveği oğlu mezbûr Yorgaki ve güveğisi mezbûr Delot’u mezbûr Delot’un evlâd-ı sıgārı Anton ve Yanaki ve Elina’yı ibrâ-i âmm-ı râfi‘u’l-hısâm ile ibrâ ve ıskāt eylediğimde onlar dahi ber-vech-i muharrer târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve muhâsamâtdan her biri bi’l-asâle ve bi’l-vekâle benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi. Min-ba‘d bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Halil Çavuş Ağa b. Mehmed, Mehmed Ağa b. Abdullah el-mübâşir, Mustafa Efendi b. Abdullah el-imâm, Serdar el-Hâc Ali Ağa, el-Hâc Hasan b. Yakub, el-Hâc Mehmed b. Hüseyin, Ahmed Beşe b. Abdullah, Turşucu Mustafa b. Receb, Camcı Hüseyin Çelebi, Berber es-Seyyid Mustafa, Kapıcı Süleyman Çelebi, Mehmed Çelebi b. Abdullah el-muhzır, Papa Yanaki v. Yorgi, Papa Makri v. Dimitri, Papa Asani v. Yani, Panayot v. Lefter.