Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 93 Hüküm no: 55 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akbıyık mahallesinden akıl hastası olan Ömer Ağa’ya kardeşi Osman Efendi’nin vasî tayin edildiği Mahmiye-i İstanbul’da Ayasofya-i kebîr kurbünde Akbıyık mahallesi sâkinlerinden Ömer Ağa b. el-Hâc Mehmed Efendi el-Kabbânî nâm kimesne bi-emrillâhi te‘âlâ cünûn-ı mutbık ile mecnûn olup tesviye-i umûruna kıbel-i şer‘den bir vasî nasb ve ta‘yîn olunmak lâzım ve mühim ve mecnûn-ı mezbûrun karındaşı işbu bâ‘isü’l-kitâb umdetü’l-eşbâh Osman Efendi sulehâdan mütedeyyin ve müstakīm ve her vechile vesâyet-i mezbûre uhdesinden gelmeğe kādir idiği zeyl-i sahîfede mektûbü’l-esâmî sikātü sahîhati’l-kelimâtdan her biri alâ-tarîkı’ş-şehâde ihbâr etmeleriyle hâkim-i muvakkı‘-ı sadr-ı kitâb tûbâ-leh ve hüsnü-meâb efendi hazretleri mûmâ-ileyh Osman Efendi’yi karındaşı mecnûn-ı mezbûrun tesviye-i umûruna vasî nasb ve ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesin alâ-mâ-yenbagî edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Mefharu’l-kuzât Ahmed Efendi b. İbrahim, el-Hâc Ahmed Çelebi b. Mustafa, İsmail Çelebi b. Hasan, el-Hâc Ali b. Mehmed, Mehmed Bey b. Yusuf, Mehmed Çelebi b. Süleyman, Mehmed Çelebi b. Receb, Salih b. Süleyman, Mehmed Çelebi [b.] Abdullah.