Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 93 Hüküm no: 56 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tophâne Karabaş mahallesinden Fatıma’nın kendisini bâyinen boşayan kocası İbrahim’de kalan alacağını aldığı Mahrûse-i Galata muzâfâtından kasaba-i Tophâne mahallâtından Karabaş mahallesi sâkinelerinden olup zâtı ta‘rîf-i şer‘î ile mu‘arrefe olan Fâtıma bt. Ömer nâm hatun meclis-i şer‘-i hatîr-i lâzımü’t-tevkīrde zevc-i sâbıkı işbu bâ‘isü’l-kitâb es-Seyyid İbrahim b. es-Seyyid Mustafa nâm kimesne mahzarında ikrâr ve takrîr-i kelâm edip târih-i kitâbdan iki sene mukaddem mezbûr es-Seyyid İbrahim beni bâyinen tatlîk etmekle zimmetinde mütekarrir ve ma‘kūdün-aleyh elli guruş mehr-i müeccelim zimmetinde bâkī kalmağla mehr-i mezkûru mezbûr es-Seyyid İbrahim’den taleb ve da‘vâ eylediğimde ol dahi cevâbında târih-i mezkûrda beni bâyinen tatlîk eylediğini ikrâr lâkin mehr-i mezkûr elli guruş da‘vâsından benim zimmetimi ibrâ eyledi deyicek beynimizde nizâ‘-ı küllî cereyân etmişidi. El-hâletü-hâzihi beynimize muslihûn tavassut edip da‘vâ-yı mezkûremden beni mezbûr es-Seyyid İbrahim ile on iki guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on iki guruşu mezbûr es-Seyyid İbrahim yedinden ahz u kabz eylediğimden sonra hukūk-ı zevciyete ve târih-i kitâba gelince sâir beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan ben mezbûr es-Seyyid İbrahim’in zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi kezâlik hukūk-ı zevciyete ve târih-i kitâba gelince sâir beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan benim zimmetimi ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: el-Hâc Veli Efendi el-müezzin, Osman b. Mahmud, Arabacı İvaz Beşe b. ( ), Mustafa Efendi kâtib-i mâliye, Ahmed Ağa b. Mustafa, diğer Ahmed Ağa b. İbrahim.