Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 281 Hüküm no: 398 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avraham v. İlya’nın Mustafa Beşe’ye olan borcunu taksitle ödeyeceği Tüccâr tâifesinden olup mahmiye-i İstanbul’da Mahmudpaşa kurbünde sâkin Mustafa Beşe b. Resül nâm kimesne mahfil-i şer‘-i şerîfde Yahûd tâifesinden olup Sisilya cemâ‘atinden olan bâ‘isü’r-rakīm Avraham v. İlya muvâcehesinde ikrâr ve takrîr-i kelâm [edip] mezbûr Avraham zimmetinde vasıf ve mikdârı beynimizde ma‘lûm sof bahâsından on iki bin akçe hakkım olup lâkin def‘aten edâya mezbûr Avraham’ın adem-i iktidârı olmağla târîh-i kitâbdan her otuz günde üç yüz akçe verip bin iki yüz gün tamamında bi’t-tamam îfâ eylemek taksît ve te’cîl eyledim dedikde mukırr-ı mezbûru ikrâr-ı meşrûhunda mezbûr Avraham bi’l-muvâcehe tasdîk ve müeccel ve mukassat on iki bin akçe deyni olduğunu bi’l-müşâfehe tahkīk eyledikden sonra meblağ-ı mukassat-ı mersûme mezbûr Avraham’ın sulbî oğulları Mosi ve İlya ve Bünyamin nâm Yahûdiler emr ve kabûlü hâvi kefâlet-i sahîh [ile] kefîl bi’l-mâl olduklarından sonra mezbûrûn Mosi ve İlya ve Bünyamin’in dahi nefislerine ve hîn-i mutâlebede ihzârlarına Portukal cemâ‘atinden İsrail v. Yato nâm Yahûdi kefîl olmağın mâ-vaka‘a bi’t-taleb ketb olundu. Fî-gurreti Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: Şeyh Mehmed Çelebi [b.] Musa, Ali Efendi b. Mehmed Efendi, Ali Beşe b. Abdullah, Pîrî Beşe b. Hüseyin, İbrahim b. Davud ve gayruhum.