Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 281 Hüküm no: 399 Orijinal metin no: [58b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin bağını el-Hac Muslı’ya sattığı Mahmiye-i İstanbul’da Hızır Bey Mahallesi’nde sâkin Mustafa Efendi b. Hasan meclis-i şer‘-i hatîr-i lâzımü’t-tevkīrde işbu bâ‘isü’l-kitâb el-Hâc Muslı b. Ali nâm kimesne muvâcehesinde ikrâr-ı tâm ve takrîr-i kelâm edip İznikmid kazâsına tâbi‘ Değirmenderesi nâm karyede vâki‘ bir tarafı Cihan Bali bağı ve bir tarafı değirmen arkı ve bir tarafı Berber Hasan bağı ve bir tarafı tarîk-i âm ile mahdûd olan bir kıt‘a mülk bağımı mezbûr el-Hâc Muslı’ya bey‘-i bâtt-ı sahîh-i şer‘î ile on altı bin akçeye bey‘ edip ol dahi iştirâ ve kabûl eyledikden sonra semeni olan meblağ-ı mezbûr on altı bin akçeyi yedinden tamamen ahz u kabz edip zikrolunan bağımı mahallinde kabz ve tasarrufa müşteri-i mezbûr el-Hâc Muslı’yı taslît eyledim ba‘de’l-yevm zikrolunan bağda benim alâkam kalmadı keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb ü sebt olundu. Fi’l-yevmi’s-sâlis min-Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: Veli Beşe b. Mustafa, Ali Beşe b. Abdullah, Mustafa Çelebi b. Mehmed, Mehmed Beşe b. Hamza, Ramazan Beşe b. Abdullah ve gayruhum mine’l-huzzâr.