Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 94 Hüküm no: 57 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrâf Haçador’un Kiraki bt. Yorgi’de olan alacağını aldığı Sarrâf tâifesinden Haçador v. Melkon nâm Ermeni meclis-i şer‘-i şerîf-i enverde mahrûse-i Galata kasabasına tâbi‘ kasaba-i Beşiktaş’da Sinan Paşa mahallesi sâkinelerinden bâ‘isetü hâzihi’l-vesîka Kiraki bt. Yorgi nâm Nasrâniye muvâcehesinde ikrâr ve takrîr-i kelâm edip bundan akdem mesfûre Kiraki zimmetinde ber-mûceb-i temessük cihet-i karz-ı şer‘îden iki yüz on iki guruş hakkım olmağla meblağ-ı mezbûru taleb ve da‘vâ eylediğimde mesfûre Kiraki meblağ-ı mezkûr ber-vech-i muharrer bana deyni olduğunu ba‘de’l-ikrâr beynimizde muslihûn tavassut edip da‘vâ-yı mezkûremden beni mesfûre Kiraki ile yüz yirmi beş guruş üzerine musâlaha eylediklerinde ben dahi sulh-ı mezbûru kabûl ve bedel-i sulh-ı mezkûr yüz yirmi beş guruşu mesfûr Kiraki yedinden ahz u kabz eylediğimde[n] sonra mâ‘adâya müte‘allika âmme-i de‘âvî ve mutâlebât ve muhâsamâtdan mezbûre Kiraki ile meblağ-ı mezkûra kefîl ve dâmin olan zevci Lefter v. Praşkova’nın zimmetlerini ibrâ-i âmm-ı râfi‘u’l-hısâm ile ibrâ ve ıskāt eylediğimde mezbûre Kiraki zimmî bedel-i sulh-ı mezkûre vesâire müte‘allika âmme-i de‘âvî ve mutâlebât ve muhâsamâtdan benim zimmetimi ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Mehmed Çelebi b. Abdullah, Abdünnebi b. Nuh, Du‘âcı İbrahim b. Mustafa, Salih b. Süleyman [b.] Mahmud el-muhzır, Mustafa Çelebi b. Abdullah, Yakub b. Abdullah.