Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 96 Hüküm no: 59 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun ile Abdullah Çelebi’nin muhâlaa yoluyla boşandıkları Mahmiye-i İstanbul’da Kabasakal mahallesi sâkinelerinden Fâtıma bt. Mustafa Çelebi b. Mehmed nâm hatun tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iye ile ârifân Mehmed Çelebi b. Veyis ve Ahmed Çelebi b. Mustafa nâm kimesneler şehâdetleriyle vekâleti sâbit olan babası mezbûr Mustafa Çelebi meclis-i şer‘-i şerîf-i enverde bâ‘isü’l-kitâb Abdullah Çelebi b. Abdüsselam nâm kimesne mahzarında bi’l-vekâle ikrâr-ı tâm ve takrîr-i kelâm edip mezbûr Abdullah Çelebi <> kızım müvekkilem mezbûre Fâtıma Hatun’un zevci olup beynlerinde hüsn-i zindegâneleri kalmamağla zimmetinde mütekarrir ve ma‘kūdün-aleyh olan [15a] altı bin akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzere ve bedel-i hul‘ olmak üzere mâlından kendiye medfû‘u olan on dört guruş bir rub‘ guruşdan zimmeti berî olmak üzere zevci mezbûr Abdullah Çelebi ile bi’l-vekâle muhâla‘a-i sahîha-i şer‘iye ile muhâla‘a eylediğinde ol dahi ber-vech-i meşrûh hul‘-ı mezbûru kabûl edip hukūk-ı zevciyete ve târih-i kitâba gelince beynlerinde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâ ve kâffe-i mutâlebâtdan her biri âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Halil Efendi b. Hasan imâm-ı mahalle-i mezbûr, Mehmed Ağa b. el-Hâc Şa‘ban, es-Seyyid Osman Çelebi b. Osman, İbrahim Çelebi b. Ahmed, Ahmed Çelebi b. Hasan, Kasım b. Mehmed el-muhzır, İbrahim Çelebi b. Mustafa du‘âcı ve gayruhum.