Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 96 Hüküm no: 60 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumkapı Nişancı mahallesinden Fâtıma bt. Hüseyin’in küçük çocuğu için boşandığı kocası Osman Çelebi’den nafaka talebi Mahmiye-i İstanbul’da Kumkapı dâhilinde Nişancı mahallesinde sâkine olup zâtı Hüseyin Çelebi b. Ali ve es-Seyyid Mustafa Çavuş b. Musa nâm kimesneler ta‘rîfleriyle mu‘arrefe olan bâ‘isetü hâzihi’l-vesîka Fâtıma bt. Hüseyin nâm hatun meclis-i şer‘-i hatîr-i lâzımü’t-tevkīrde zevc-i sâbıkı es-Seyyid Osman Çelebi b. Ali mahzarında takrîr-i kelâm ve ta‘bîr ani’l-merâm edip mezbûr es-Seyyid Osman’ın firâşından hâsıl ve benden mütevellid olup ve bi-hakkı’l-hıdâne hacr ve terbiyemde olan işbu sadrî oğlum Mustafa nâm sagīrin nafaka ve kisveye ihtiyâcı olmağla kıbel-i şer‘den babası mezbûr es-Seyyid Osman Çelebi üzerine kadr-ı kifâye meblağ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi sagīr-i mezbûr Mustafa’nın nafaka ve kisve-bahâsıʼçün târih-i kitâbdan babası mezbûr Osman Çelebi üzerine bi’t-terâzî beher yevm onar akçe farz ve takrîr edip meblağ-ı mefrûz-ı mezbûru sagīr-i merkūmun nafaka ve kisve vesâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr es-Seyyid Osman Çelebi üzerine rücû‘a mezbûre Fâtıma Hatun’a izin vermeğin mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Şevval li-sene selâse ve erba‘în ve mie ve elf. Şuhûdü’l-hâl: Hüseyin Çelebi b. Ali, Hasan b. Ahmed, Seyyid Mustafa Çavuş b. Musa el-mübâşir, Mehmed Çelebi b. Abdullah bölükbaşı, İbrahim Çelebi b. Mustafa du‘âcı, Sarımsakcızâde Ahmed Çelebi el-muhzır, Yakub b. Abdullah el-muhzır, Kasım Mehmed Çelebi el-muhzır ve gayruhum.