Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 101 Hüküm no: 67 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin Milan’ın Akçakenîse köyünde bulunan bahçeli evini Osman Çelebi’ye sattığı Vilâyet-i Anadolu’da Kangırı/Çankırı Sancağı’nda Milan kazâsına tâbi‘ Akçakenîse nâm karye ahâlîsinden olup mahmiye-i İstanbul’da Koska kurbünde Hüseyin Ağa Dârü’l-hadîsi’nde müsâfiren sâkin Mehmed Efendi b. Osman Efendi nâm kimesne meclis-i şer‘-i şerîf-i enverde işbu bâ‘isü’l-kitâb Osman Çelebi b. el-Hâc Mustafa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup karye-i mezbûrede vâki‘ bir tarafdan Hasan nâm kimesne mülkü ve bir tarafdan Nuh Beşe mülkü ve iki tarafdan tarîk-ı âm ile mahdûd fevkānî bir bâb oda ve tahtânî iki bâb oda ve bir anbâr ve samanhâne ve harman yeri ve eşcâr-ı müsmire ve gayr-ı müsmireli bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr Osman Çelebi’ye yüz guruşa bey‘ ve temlîk eylediğimde ol dahi ber-vech-i muharrer iştirâ ve temellük eylediğimden sonra semeni olan meblağ-ı mezbûr yüz guruşu mezbûr Osman Çelebi yedinden tamamen ahz u kabz ve mahâllinde zabt ve taslît eyledim. Ba‘de’l-yevm menzil-i mahdûd-ı mezkûrda benim kat‘a alâka ve medhalim kalmayıp mezbûr Osman Çelebi’nin mülk-i müşterâsı olmuşdur. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-Şevval li-sene selâse ve erba‘în ve mie ve elf. Şuhûdü’l-hâl: el-Hâc Osman Ağa b. Cafer, el-Hâc Ahmed Ağa b. Halil, İbrahim Beşe b. Receb, Mehmed Beşe b. Ahmed, Hasan Beşe b. Halil, Mustafa b. Hüseyin, es-Seyyid Bali Çelebi b. Küçük Ali, Kavukçu Ali b. Receb, diğer Hasan b. Hüseyin, Molla Mehmed b. Abdullah.