Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 102 Hüküm no: 68 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samah ve Kürte köyü ahalisinin kendilerinden kanun dışı fazla para aldığı iddiasıyla Ebubekir Bey’e açtıkları davanın sulhla sonuçlandığı Vilâyet-i Anadolu’da Malatya kazâsına tâbi‘ Akçadağ nâhiyesinde Samac [Samah] nâm karye ahâlîsinden olup mahmiye-i İstanbul’da Parmakkapı kurbünde el-Hâc Osman nâm kimesne hânında müsâfiren sâkin Mehmed b. Köse Mehmed ve Ahmed b. Veli ve Kürte nâm karye ahâlîsinden Molla Veli b. Ali ve Halil b. Bekir nâm kimesneler meclis-i şer‘-i şerîf-i enverde karyeteyn-i mezkûreteyne ber-vech-i mâlikâne mutasarrıf olan umdetü’l-emâcid ve’l-ekârim Ebûbekir Bey b. Mustafa mahzarında her biri karyeteyn-i mezkûreteyn ahâlîsinde ma‘lûmü’l-esâmî re‘âyâ taraflarından vekâleten ve kendileri asâleten ikrâr-ı tâm ve takrîr-i kelâm edip mûmâ-ileyh Ebûbekir Bey’e zikirleri mürûr eden karyeteyn ahâlîleri üzerlerine edâsı lâzım gelen rüsûm-ı ra‘iyyet ve a‘şâr-ı şer‘iyesin vesâir cüz’î ve küllî hukūk ve rüsûmumuzu emr ve defter-i cedîd mûcebince edâ edip kusûrumuz yoğiken mûmâ-ileyh Ebûbekir Bey hilâf-ı sûret-i defter-i cedîd-i hakānî vere geldiğimiz rüsûm-ı ra‘iyyetden ziyâde ve sartafiye? ve harman bağı nâmıyla akçemizi aldı deyü da‘vâya tesâddî etmişidik. El-hâletü-hâzihi da‘vâ-yı mezkûremizden asâleten ve vekâleten fâriğler olup ve’l-hâsıl gerek kendileri ve gerek tarafından adamları sûret-i defter-i hakanîden ziyâde re‘âyâdan nesne mutâlebesiyle rencîde etmemek üzere sulh ve beynimizi tevfîk eylediklerinde biz dahi asâleten ve vekâleten sulh-ı mezbûru ba‘de’l-kabûl husûs-ı mezkûra müte‘allika da‘vâdan mûmâ-ileyh Ebûbekir Bey’in ve adamlarının târih-i kitâba gelince zimmetleri ibrâ ve ıskāt eylediğimizden sonra mûmâ-ileyh Ebûbekir Bey dahi ba‘de’l-yevm ber-minvâl-i muharrer re‘âyâdan sûret-i defter-i hakanîden ezyed nesne mutâlebe etmemek üzere ta‘ahhüd eyledi dediklerinde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’l-hâdî ve’l-aşer min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Molla Mustafa b. Abdülkerim, Halil Çelebi b. Ali Beşe, Şehbur karyesinden Ağvanlı Hüseyin Beşe b. Mehmed, Hüseyin Beşe b. Mehmed, Ahmed b. Zeynel, Mehmed b. Zeynel.