Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 111 Hüküm no: 76 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Korukmahmud mahallesinden Hadîce Hatun’un Mustafa b. Seydi’den çocukları için nafaka talebi Nafaka. Mahmiye-i İstanbul’da Koruk Mahmud mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Hadîce bt. Hüseyin nâm hatun meclis-i şer‘-i şerîf-i enverde zevc-i sâbıkı Mustafa b. Seydi mahzarında takrîr-i da‘vâ edip mezbûr Mustafa’nın firâşından hâsıl ve benden mütevellid olan sadrî oğullarım işbu Mehmed ve Ahmed nâm sagīrlerin nafaka ve kisve vesâir levâzım-ı zarûriyeleriʼçün hakk-ı hıdâneleri sükūtuna değin babaları mezbûr Mustafa üzerine kıbel-i şer‘den kadr-ı kifâye akçe farz ve takdîr olunmak matlûbumdur dedikde hâkim-i muvakkı‘-ı sadr-ı kitâb tûbâ-leh ve hüsnü-meâb efendi hazretleri zeyl-i kitâbda muharrerü’l-esâmî Müslimîn ihbârlarıyla boş idiği müte‘ayyin olan mezbûr Mustafa üzerine bi’t-terâzî târih-i kitâbdan her birine yevmî on ikişer akçeden cem‘an yirmi dört akçe farz ve takdîr buyurup meblağ-ı mefrûz-ı mezkûru sagīrân-ı mezbûrânın ber-vech-i muharrer nafaka ve kisve vesâir levâzım-ı zarûriyelerine harc ve sarfa ve lede’l-iktizâ istidâneye ve inde’z-zafer babaları mezbûr Mustafa üzerine rücû‘a mezbûr Hadîce Hatun’a izin birle mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-aşer min-Şevvali’l-mükerrem li-sene 1143. Şuhûdü’l-hâl: el-Hâc Hüseyin b. Receb, Mustafa Ağa b. İbrahim, Abdi Çavuş b. Abdullah, Duhânî Mehmed Çelebi b. Ahmed, Mustafa Çelebi b. Abdullah, İbrahim b. Mustafa.