Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 112 Hüküm no: 77 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Halil ile Halil Çelebi’nin muhâlaa yoluyla boşandıkları Muhâla‘a. Mahmiye-i İstanbul’da Baba Hasan Alemi mahallesi sâkinelerinden olup zâtı mahalle-i mezbûre imâmı Mehmed Efendi b. Hüseyin ve el-Hâc Hüseyin Ağ b. Mehmed ta‘rîfleriyle mu‘arrefe olan Emine bt. Halil nâm hatun mahfil-i kazâda zevci bâ‘isü hâze’l-kitâb Halil Çelebi b. Ali mahzarında ikrâr ve takrîr-i kelâm edip mezbûr Halil Çelebi zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh iki bin yedi yüz akçe mehr-i müeccelim üzerine ve nafaka-i iddet ve me’ûnet-i süknâm için bi’t-terâzî ta‘yîn olunan altı yüz akçe ki min-haysü’l-mecmû‘ üç bin üç yüz akçe üzerine mezbûr Halil Çelebi ile muhâla‘a-i sahîha ile muhâla‘a eylediğimde ol dahi hul‘-ı mezbûr ba‘de’l-kabûl hukūk-ı zevciyete ve mezbûr Halil’den iddi‘â eylediğim altın gerdâniyeye müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Yakub bin Abdullah, Ekmekçibaşı Abdullah Bey, el-Hâc Ahmed b. Abdülkadir, el-Hâc İsmail, Mehmed Çelebi b. Abdullah, İbrahim b. Mustafa.