Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 112 Hüküm no: 78 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa ve ortağının, zahîreyi yerine ulaştırmadıkları iddiasıyla paralarını alıp habseden Bolu voyvodası Yusuf Ağa aleyhine açılan davanın sulhla sonuçlandığı 300 guruşa Bolu voyvoda[sı] ile sulh. Mahrûse-i Galata mahallâtından Câmi‘-i kebîr mahallesi sâkinlerinden el-Hâc Mustafa b. Ömer ve şerîki Ahmed b. Mustafa nâm kimesneler meclis-i şer‘-i hatîr-i lâzımü’t-tevkīrde ber-vech-i mâlikâne Bolu voyvodası umdetü’l-eşbâh bâ‘isü hâze’l-kitâb Yusuf Ağa b. Ahmed b. İbrahim tarafından husûs-ı âti’z-zikri tasdîka vekîl-i şer‘îsi olan mûmâ-ileyhin hazînedârı Hasan Çelebi b. Abdullah nâm kimesne mahzarında ikrâr ve takrîr-i kelâm edip târih-i kitâbdan on dört sene mukaddem mübâya‘ası fermân olunan zehâyiri Bartın iskelesinde sefînemize tahmîl ve mahâll-i me’mûra nakleylediğimizden sonra müvekkil-i mûmâ-ileyh Yusuf Ağa “siz zikrolunan zehâyiri mahâll-i me’mûra nakleylemediniz” deyü bizi bi-gayr-ı hakkın habs ve mâlımızdan bin guruşumuzu [20b] ahz etmişdir deyü da‘vâ sadedinde olduğumuzda müvekkil-i mûmâ-ileyh dahi bi’l-külliye inkâr etmeğin beynimizde nizâ‘-ı küllî cereyân etmişidi. El-hâletü-hâzihi beynimizde muslihûn tavassut edip da‘vâ-yı mezkûremizden bizi müvekkil-i müşârün-ileyh Yusuf Ağa ile üç yüz guruş üzerine inşâ-i akd-i sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr üç yüz guruşu müvekkil-i mûmâ-ileyh Yusuf Ağa yedinden ahz u kabz eylediğimizden sonra mâ‘adâsı olan yedi yüz guruşa müte‘allika âmme-i da‘vâdan müvekkil-i mûmâ-ileyh Yusuf Ağa ile şerîki İbrahim Paşa’nın zimmetlerini ibrâ-i âmm-ı râfi‘u’l-hısâm ile ibrâ ve ıskāt eyledik dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: es-Seyyid Mehmed Çelebi b. Abdülkadir, Hüseyin Çelebi b. Mehmed, Mehmed b. Mustafa, Tahtacı Mehmed Çelebi b. Abdullah.