Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 113 Hüküm no: 79 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdisubaşı mahallesinden Adamaki’nin mirasının vârisleri arasında taksimi Mahmiye-i İstanbul’da Fenerkapısı hâricinde Abdi Subaşı mahallesi ahâlîsinden iken bundan akdem hâlik olan Adamaki v. Canpik nâm zimmînin verâseti zevcesi Anastaşa bt. Panayot nâm Nasrâniye ile sulbî kebîr oğlu [oğulları] Yorgaki ve Kostantin ve Dimitraki’ye ve kebîre kız Ezmaragda’ya münhasıra olduğu lede’ş-şer‘i’l-enver zâhir ve mütebeyyin oldukdan sonra kendiden asîl ve sagīre-i merkūmenin anası ve kıbel-i şer‘den mansûbe vasiyyesi olan merkūme Anastaşa Nasrâniye ile mezbûrân Yorgaki ve Dimitrâki ve mesfûre Telaşi Nasrâniye tarafından husûs-ı âti’l-beyânı vekîl olduğu Yemandi v. Foti ve Kostantin v. Nikola nâm zimmîler şehâdetleriyle şer‘an sâbit olan mesfûr Kostantin vekâleten meclis-i şer‘-i şerîf-i enverde yine mahalle-i merkūme ahâlîsinden iken bundan akdem hâlik olan Maryose bt. Penaki nâm Nasrâniyenin sulbî kebîr oğlu ve hasren vârisi olmağla bi’l-verâse terekesine vâzı‘u’l-yed olan râfi‘u’s-sifr İstefanaki v. Andonaki nâm şâbb-ı emred zimmî muvâcehesinde bi’l-asâle ve bi’l-vekâle ikrâr ve takrîr-i kelâm edip mezbûr İstefanaki zimmînin anası hâlike-i merkūme Maryose babam hâlik-i merkūm Adamaki yedinde olan temessük mantûkunca yedinden altı yüz seksen guruş istikrâz ve kabz ve istihlâk edip meblağ-ı mezbûru kable’l-edâ merkūme Maryose hâlike olmağla meblağ-ı mezbûru terekesinden kable’l-istifâ babam merkūm Adamaki dahi hâlik olmağla meblağ-ı merkūm verese-i mezbûrûna intikāl eyledi deyü hâlike-i merkūme Maryose Nasrâniyenin terekesinden oğlu mezbûr İstefanaki zimmîden bi’l-asâle ve bi’l-vekâle taleb ve da‘vâ eylediğimde ol dahi inkâr edip <> bizim dahi isbâtdan aczimiz olmağla merkūm İstefanaki’ye yemîn teklîf eylediğimde ol dahi yemîn sadedinde olup edeceği indimde mütehakkık oldukda sulh sagīr hakkında ve evlâ olduğuna binâen beynimizde muslihûn tavassut edip da‘vâ-yı mezkûremden merkūm İstefanaki ile beni üç yüz seksen guruş üzerine inşâ-i akd-i sulh eylediklerinde ben dahi bi’l-asâle ve bi’l-vekâle sulh-ı <> mezbûru kabûl ve bedel-i sulh olan üç yüz seksen guruşu yedinden ahz u kabz edip mâ‘adâ üç yüz esedî guruşa müte‘allika da‘vâdan mezbûr İstefanaki zimmînin ve verese-i sâirenin bi’l-asâle ve bi’l-vekâle zimmetlerini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Şevvali’l-mükerrem li-sene selâse sene 1143. Şuhûdü’l-hâl: Mustafa Ağa cizyedâr-ı Fena[r], Ahmed Ağa cizyedâr-ı Fena[r], Salih Çelebi b. Süleyman muhzır, Mustafa Çavuş b. el-Hâc Mehmed, Polikron v. Yasef, Apakraz v. Yorgaki, Kostantin v. Aleksandıra.