Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 114 Hüküm no: 80 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peremedili Mustafa’nın küçük oğlunun tasarrufuna geçen köy tımarı gelirinin vasîsine teslim edildiği Vilâyet-i Rumeli’nde Avlonya Sancağı’nda vâki‘ Peremedi kazâsı ahâlîsinden iken bundan akdem vefât eden Mustafa b. Abdullah b. Abdurrahman’ın sulbî oğlu sagīr Mehmed’in ber-vech-i âtî tesviye-i umûruna kıbel-i şer‘den mansûb vasîsi olduğunu iddi‘â eden Ebûbekir b. Ali nâm kimesne meclis-i şer‘-i şerîf-i enverde işbu bâ‘isü’l-kitâb Gümülcine kasabası sâkinlerinden el-Hâc Hüseyin Ağa taraflarından vekîl-i şer‘îleri olan li-ebeveyn er karındaşları Mehmed Efendi mahzarında üzerine da‘vâ ve takrîr-i kelâm edip mezbûr sagīr Mehmed’in bâ-berât-ı âlîşân tasarrufunda olup Ferecik nâhiyesinde ve umûr-ı şer‘iyesi Gümülcine kazâsına tâbi‘ Yahyabeyli nâm karyede vâki‘ tımarının a‘şâr-ı şer‘iye ve rüsûm vesâir mahsûlâtını ahz u kabz ve bana îsâl ve teslîm etmek üzere merkūmân el-Hâc Mahmud Ağa ve Ebûbekir Ağa için karındaşları merkūm Mehmed Efendi’ye bin yüz kırk üç senesi Martı ibtidâsından bir sene tamamına değin yüz otuz guruş bedel mukābelesinde bi’l-vesâye der-uhde ve iltizâm eylediğimde mezbûr Mehmed Efendi dahi bi’l-vekâle iltizâm ve kabûl ve müvekkilân-ı mezbûrân dahi tımar-ı mezbûru ber-vech-i muharrer zabt ve tasarruf ve bedel-i mezkûru ahz u kabz ve istifâ eylediklerinden sonra vekîl-i mezbûra suâl olunup müvekkilân-ı mezbûrân bedel-i mezkûru bana edâya tenbîh olunması bi’l-vesâye matlûbumdur dedikde gıbbe’s-suâl mezbûr Mehmed Efendi cevâbında kabzına [kaziyye] vech-i muharrer üzere olduğunu bi’l-vekâle ikrâr lâkin müdde‘î-yi mezbûrun ber-minvâl-i muharrer vasî olduğunu inkâr edicek müdde‘î-yi mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup fi’l-asl vilâyet-i Rumeli’de Permed kazâsına tâbi‘ Türemiş nâm karye ahâlîlerinden Ayasofya-i kebîr kurbünde müsâfiren sâkin Mustafa b. Mehmed ve Murtaza b. Musa nâm kimesneler li-ecli’ş-şehâde mahfil-i kazâya hâzırân olup istişhâd olunduklarında fi’l-hakīka sagīr-i mezbûr Mehmed b. Mustafa b. Abdurrahman’ın tesviye-i umûruna işbu müdde‘î-yi mezbûr Ebûbekir kıbel-i şer‘den mansûb vasîsidir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh vasîyy-i mezbûr meclis-i şer‘de vekîl-i mezbûr Mehmed Efendi mahzarında bi’l-vesâye ikrâr ve takrîr-i kelâm edip ânifen edâsına tenbîh olunan vekîl-i merkūm Mehmed Efendi dahi ba‘de’l-kabûl bedel-i iltizâm olan meblağ-ı mezbûre yüz otuz guruşunu doksan guruşunu <> Ebûbekir Çelebi ve kırk guruşunu el-Hâc Mahmud nâm kimesneler yedleriyle sagīr-i merkūm için bana def‘ ve teslîm eylediklerinden sonra ben dahi sagīr Mehmed’in umûruna safla ba‘de’l-istihlâk meblağ-ı mezbûra <> müte‘allika da‘vâdan benim ve sagīr Mehmed’in zimmetini ibrâ-i âm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Makri sâkinlerinden Muslu b. Mehmed, Yenişehirli el-Hâc Mehmed Ağa b. Hacı Sinanzâde, karındaşı el-Hâc Mustafa, Yusuf Bey b. Abdullah tâbi‘-i el-Hâc Mehmed Ağa, Durak Bey voyvoda-i Gümülcine.