Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 115 Hüküm no: 81 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimarsinan mahallesinden Râbia Hatun’un mirasını Ayşe Hatun’a bıraktığı Husûs-ı âti’l-beyânın mahâllinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ Mustafa Efendi mahmiye-i İstanbul’da Mimar Sinan mahallesinde sâkin Mehmed Ağa b. Mehmed’in menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i şerîf ettikde mahalle-i mezbûre sâkinelerinden olup zâtı mahalle-i mezbûre imâmı Mehmed Efendi b. Mustafa ve Molla Osman b. İsmail ve Kâtib Mehmed Efendi b. Ahmed ta‘rîfleriyle mu‘arrefe olan Râbia Hatun bt. el-Hâc Süleyman b. Abdullah meclis-i ma‘kūd-ı mezkûrda bâ‘isetü hâzihi’l-vesîka Âişe bt. Mehmed nâm hatun mahzarında ikrâr ve takrîr-i kelâm edip hâlâ müsinne ve alîle olup mezbûre Âişe Hatun menzilinde sâkine olmamla bi-emrillâhi te‘âlâ vefât eylediğimde mezbûre Âişe Hatun cemî‘ terekemi ahz u kabz ve sünnet-i seniyye üzere techîz ve tekfîn ve levâzım-ı defnime görüp yine terekemden üç bin akçe ıskāt-ı salâtım için vech-i şer‘î üzere fukarâya devroluna ve terekemden mikdâr-ı kifâye tabh-ı ta‘âm ve it‘âm-ı fukarâ oluna ve benim vâris ve vârisem olmamağla terekemden mesârif-i mezkûreden fazla nesne kalırsa mezbûre Âişe Hatun nefsiʼçün ahz u kabz ede deyü vasiyyet ve tenfîzine mezbûre Âişe Hatun’u vasîyy-i muhtâr nasb ve ta‘yîn eyledim dedikde ol dahi vesâyet-i mezbûreyi kabûl ve merâsimini edâya ta‘ahhüd ve iltizâm eylediğini mevlânâ-yı mezbûr mahâllinde ketb ve tahrîr ve ma‘an ba‘s olunan Mahmud b. Ahmed ve İsmail b. Hüseyin ile meclis-i şer‘a gelip her biri alâ-vukū‘ihî inhâ ve takrîr etmeğin mâ-hüve’l-vâki‘ ketb olundu. Fi’l-yevmi’s-sâdis ve’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Mehmed Ağa b. Mehmed, Mehmed Efendi b. Mustafa, Derviş b. el-Hâc Mehmed b. Mehmed, Kâtib Mehmed Efendi b. Ahmed, Fahrü’l-kuzât Abdullah Efendi, Molla Osman b. İsmail, Ali Beşe b. Osman, Berber Ömer Çelebi b. Süleyman, Abdullah Beşe b. Abdullah.