Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 116 Hüküm no: 82 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakilbend mahallesinde vakıf evin mütevellî izniyle başkasına ferâğ edilmesi Mahmiye-i İstanbul’da Küçük Ayasofya kurbünde Nakilbend mahallesinde sâkin iken bundan akdem vefât eden İbrahim b. Mehmed’in sulbî sagīr <> oğlu Mustafa ve sulbiye kızı Hanife nâm sagīrlerin vâlideleri ve tesviye-i emirlerine kıbel-i şer‘den mansûbe vasiyyeleri bâ‘isetü’l-vesîka Emetullah bt. Abdullah meclis-i şer‘-i şerîf-i enverde bi’l-vesâye takrîr-i kelâm edip zevcim müteveffâ-yı mezbûrun hayatında merhûm Kaba Sakal vakfından ile’l-vefât taht-ı <> tasarrufunda olup mahalle-i mezbûrede vâki‘ bir tarafdan vakf-ı mezbûr odaları ve iki tarafdan Silâhşör Ömer Ağa tasarrufunda olan menzil ve bir tarafdan tarîk-ı âm ile mahdûd menzil müşrif harâb olup menzil-i mezkûrdan mâ‘adâ ism-i mâl ıtlâk olunur nesne intikāl etmeyip ta‘mîr ve termîme sagīrân-ı mezbûrânın kat‘a iktidârları olmayıp istidâne ile ta‘mîr olundukda hâsılı harcına vefâ etmemeğin menzil-i mezkûr ba‘de’l-müzâyede bedel-i misli ve ma‘rifet-i mütevellî ile âhara bi’l-vesâye ferâğ ve yed-i istirbâh ve istiğlâl olunmak sagīrân-ı mezbûrân haklarında her vechile enfa‘ ve evlâ olmağın hakīkat-i hâl mahalle-i mezbûre ahâlîsinden vukūfu olan işbu hâzırûn bi’l-meclis bî-garaz Müslimûndan istihbâr olunup haberleri tahrîr ve ber-vech-i muharrer kıbel-i şer‘den bana izin verilmek matlûbumdur dedikde fi’l-vâki‘ hâl bâlâd[a] tahrîr olunan minvâl üzere idiği mahalle-i mezbûre ahâlîsinden zeyl-i vesîkada muharrerü’l-esâmî bî-garaz Müslimîn ihbâr etmeleriyle hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi menzil-i mahdûd-ı mezkûru ber-vech-i muharrer ba‘de’l-müzâyede bedel-i misli ve ma‘rifet-i mütevellî ile âhara ferâğ ve tefvîze mezbûre Emetullah Hatun’a kıbel-i şer‘den izin birle mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Fazlullah Çelebi b. İsmail, Mustafa Çelebi b. Hasan Berber, Hüseyin Çelebi b. Abdullah, Mehmed Çelebi b. Mustafa.