Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 117 Hüküm no: 83 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Bey’in tarlalarının Mustafa Ağa’ya satıldığı Mahmiye-i İstanbul’da Arabacılar kârhânesi kurbünde Kapıağası mahallesinde sâkin umdetü’l-eşbâh Hâfız Abdullah Bey b. el-Hâc Mehmed Efendi nâm kimesne meclis-i şer‘-i şerîf-i enverde fahrü’s-sâdâti’l-kirâm bâ‘isü hâze’l-kitâb es-Seyyid el-Hâc Mustafa Ağa b. es-Seyyid Mehmed mahzarında ikrâr ve takrîr-i kelâm edip Armiye’li Salih Ağa Kethudâsı el-Hâc Yusuf nâm müteveffânın kızı olup bundan akdem vefât eden Emetullah Hatun’dan hayatında bedel-i ma‘lûm ve medfû‘ ve makbûzu mukābelesinde bâ-ma‘rifet-i sahib-i arz tefevvüz ve kabûl etmemle yedimde hakk-ı müfevvazım olup İnebahtı Sancağı’nda İrmiye kazâsında Aydınlı nâm karye sınırı dâhilinde vâki‘ Kırçin mülhakātından lede’l-cîran ma‘lûmü’l-hudûd ve’l-kıt‘a yedi aded çifti mütehammil mezrû‘ât-ı ma‘lûmeyi hâvî yedi aded tarlalarımın hakk-ı tasarruflarını bâ-ma‘rifet-i sahib-i arz mezbûr es-Seyyid el-Hâc Mustafa Ağa’ya bin iki yüz doksan beş guruş bedel mukābelesinde ferâğ ve tefvîz ve mahâllinde kabz ve tasarrufa taslît ve ma‘lûmü’l-esâmî ve’l-eşhâs yedi nefer çiftçiler zimmetlerinde cihet-i karzdan hakkım olan yüz beş guruşu mezbûrûndan taleb ve da‘vâ ve ahz u kabza tarafımdan mezbûr es-Seyyid el-Hâc Mustafa Ağa’yı vekîl ve nâib-i menâb nasb ve ta‘yîn eylediğimde ol dahi ber-vech-i muharrer tefevvüz ve vekâlet-i mezbûreyi kabûl ve merâsimini edâya ta‘ahhüd ve iltizâm eylediğinden sonra bedel-i mezkûru merkūm es-Seyyid el-Hâc Mustafa yedinden ahz u kabz ve mesârifime sarfla istihlâk eylediğimden sonra mezbûr es-Seyyid el-Hâc Mustafa Ağa bedel-i mezkûra müte‘allika âmme-i de‘âvî ve mutâlebât ve muhâsâmâtdan benim zimmetimi ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-işrîn min-Şevval li-sene selâse ve erba‘în ve mie ve elf. Şuhûdü’l-hâl: Za‘îm Ömer Ağa b. Halil, el-Hâc Ali b. el-Hâc Bayram Armiye’den, el-Hâc Yusuf b. Abdullah Armiye’den, Molla Hüseyin b. Şirin, Mehmed Çelebi b. Abdullah, Hüseyin Çelebi b. İsmail, Armiye’den, Ahmed b. Abdullah, Molla Ahmed b. Abdullah, Mehmed b. Mehmed tâbi‘-i za‘îm ağa, el-Hâc Süleyman b. Abdullah.