Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 118 Hüküm no: 84 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın kendisini habseden ve parasına alan Mustafa Ağa’ya açtığı davanın sulhla sonuçlandığı Vilâyet-i Anadolu’da Misis kazâsına tâbi‘ Şeyh Baylak nâm karye ahâlîsinden olup mahmiye-i İstanbul’da müsâferet vechi üzere sâkin Mustafa b. Abdullah nâm kimesne meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka Mustafa Ağa b. Receb mahzarında ikrâr ve takrîr-i kelâm edip mezbûr Mustafa Ağa bundan akdem karye-i mezbûreye gelip “ben Kapudan Mustafa Paşa’nın tarafından mübâşirim” deyü beni ve zikrolunan karye ahâlîsinden vâfir kimesneleri bi-gayr-ı hakkın habs edip işbu hazır bi’l-meclis mütevellî Yahya Ağa yediyle zulmen mâlımdan iki yüz guruşumu ahz u kabz ve istihlâk eylediği ecilden meblağ-ı mezbûru merkūm Mustafa Ağa’dan taleb ve da‘vâ eylediğimde ol dahi inkâr etmeğin beynimizde münâza‘ât-ı kesîre ve muhâsamât-ı şedîde cereyân etmişidi. El-hâletü-hâzihi beynimiz[e] muslihûn tavassut edip da‘vâ-yı mezkûremden beni yirmi guruş üzerine inşâ-i akd-i sulh eylediklerinde ben dahi sulh-ı mezbûru ba‘de’l-kabûl ve bedel-i sulh olan meblağ-ı mezbûr yirmi guruşu merkūm Mustafa Ağa yedinden tamamen ahz u kabz eylediğimden sonra mâ‘adâya ve târih-i kitâba gelince cereyân eden ahz u i‘tâya müte‘allika âmme-i de‘âvî ve kâffe-i mutâlebât ve eymân ve muhâsamâtdan ben mezbûrân Mustafa Ağa [22b] ve Yahya Ağa’dan her birinin zimmetini ibrâ ve ıskāt eylediğimde merkūmân dahi husûs-ı mezkûra ve gayra müte‘allika âmme-i de‘âvî ve kâffe-i mutâlebâtdan benim zimmetini ibrâ ve ıskāt eylediler fîmâ-ba‘d bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Mustafa b. Hasan Urfa’dan, Molla İbrahim b. Mustafa, İvaz Çelebi b. Abdullah, Mehmed Çelebi b. Abdullah.